Pompeo aser Sedwill na sensak asem

Washington, Metsüremi/March 9 (Agencies): US secretary of state Mike Pompeo aser British NSA Mark Sedwill na tang India aser Pakistan na tsüngda mangatettep adoka aliba süngjemdaktsütsü asoshi merangdangtsü sensaksemogo, ta state department sangdong ka ajanga metetdaktsü.
Pompeo aser Sedwill na US aser UK na tsüngda tesendaktep tajung aliba maneni akangshia alima ajung nung temelenshi balala adokba densa ka nung maneni teka amteper aotsü bangjemogo, ta state department deputy spokesperson Robert Palladino-i ashi.
State department sangdong ajangsa ashiba agi, nuclear tashi aliba linük ana tsüngda mangatettep adoka aliba süngjemdaktsütsü atema US-i maneni inyaka arudar aser linir ana tsüngda sensaksem nung iba onük ya benoka sensaksemogo.
“Secretary of state Michael R Pompeo, tanü UK national security advisor Mark Sedwill den India aser Pakistan na tsüngda mangatettep adoka aliba süngjemdaktsütsü atema jenjang agitsü, Syria nung inyakyim tejakleni bener aotsü aser Iran tasa tamajung anema nokdaktsüba densema tanga onüktem aika sensaksemogo,” ta Palladino-i ashi.
February 14 nü Pakistan nung amenoker aliba kiralongrar Jaish-e-Mohammed (JeM) puri Jammu & Kashmir kübok Pulwama district maka CRFP sepai 40 tepsetba sülen linük ana tsüngda mepetmesü adok.
Iba sülen India-i Balakot nung kiralongrar amak. Tasüngnü Pakistan Air Force-i MiG-21 tayimtsü ka khazüka yok aser pilot ka apu shiba India nem March 1 nü meyipa agütsüogo.
United Nations Security Council nung permanent veto-wielding züngsem US, UK aser France-i taoba ita UNSC dang JeM tekolakba Masood Azhar ya global terrorist ka ama jatsütsü asoshi benokdanga liasü.