Pongmang amai ilonger

-K. Imliyanger Jamir,  Eralibill Dimapur.

Asangsang! Saka pongmang amai;
Khenluben ainlen senzü ama;
Tsüngremi yangluba nisung;
Tsüngremi yangluba lima nung;
Khenpiga lir kelen, Tangula sama nung;
Mengui akümer.

Meimchir inyaksangshi ajak;
Pongmang amai ilonger;
Nisung takümji akhüm ka süir amai,
Khen piga dang angur, Aser mengui akümer,
Idangji tanelaji teyanglur dangi aoer,
Saka temangji leper leni shilanger.

Asangsang! Saka pongmang amai;
Bendangli nung khen piga alidang;
Kodanga masütsü amai, Saka süadoker,
Sentong balala yanglur mazüngi inyakdang;
Memetetba anogo aser mapang ka nung;
Teyangluri ajadang,
Ali mapatem renemer.

Bendang li nung alidang,
Tasür limi asemjen asemer
Anogotaem süktokjen süktoker,
Mapa tajung süaka, Tamajung süaka yutsür;
Kibuba kidangi aodang;
Kar amang nung jashiseta aoer,
Kar sangwa nung pelaseta aoer.