Pongo aser Longchang na yimjung yanglu

Dimapur, Feb.15 (TYO) : Longleng district kübok Pongo aser Mon district kübok Longchang yim na mapang talangka likalilem tsütsü mangatettepi aruba sülen tang yim ana tsüngda parnoksasa tangatetba tajung nung tangatettep kati aruogo.

Iba yimjung yangluba takok osang ya sangdongtsü asoshi Longleng anasa Yongmon ayong nung Lapnyu apu alidak February 24, 2016 nü agitsü sentong tuluka renema lir. Iba sentong nung NBCC den Konyak Baptist Mungdang aser Phom Baptist Mungdang na pronglai shilem agitsü.

Iba sentong nungsa Parliamentary Secretary, Wb.Eshak Hessum aser MLA Wb.S.Pangnyu Phom nati tajungshi o jembitsü aser ano Deputy Commissioner Mon aser Longleng natia shilem agia jembitsü.

Iba kasa sentong nung tongti o jembirji North East Christian University nung Chancellor Rev.Dr. L.Anjo Keikung alitsü aser yimjung osang sangokja ENPO area nung aliba Baptist Mungdangtem shia nungi Executive Secretary aser ordain süa alir Tsüngrem tenzükertemi sarasademtsü.

Iba sentong nungsa ENPO, Konyak Union aser Phom Peoples’ Council nungia jembitsü aser Pongo, Longchang aser Yachem putu menden nungia tepela o ashitsü.

Iba yim ana tsüngda yimjung ken o ya January 28, 2016 nü renemba ajanga Humshu li dak aketba mangatettep ken o ajak tembangogo ta yim ana yimteni metetdaktsü.

Iba yimjung sangoktsüba February 24 anogo sentong nung Pongo aser Longchang arogo nati chiyongdaktsütsü.

Iba sentong takok ngua katettsü asoshi ajaki sarasadem nung yaridaktsüner ta sentong ketdangsertemi mepishia metetdaktsüogo.