Pop Art Gallery tembangogo

Kohima, Tsüklai/February 01 (TYO): Old NST bus stand, Kohima kübok anogo 10 tashi ayonga agiba Master Art Workshop indang Pop up Art gallery sentong January 31, 2019 Hokolbarnü takok ngua tembangogo.
Iba sentong nung Alemtemshi Jamir IAS (Retd.) tetushi tesemdanger ama jaoka liasü.
Pop Art Gallery sentong ya Rattle & Hum Foundation den Art & Culture Department, Nagaland, Savannah College of Art & Design (SCAD) aser Himalaya Fine Art den longjema ayongzüka liasü.
Sentong nung jembiba mapang Alemtemshi-i ashiba agi, art ya nisung kija tebilemba indang asalentong mesüra shisatsü ka lir. Item tasa aser asalentong inyakyim ya nisung dak keta lir. Art indang tasa aser maparen ajanga tim yimya aser jakla nung meimchirtem tejakleni anir aotsüsa inyaktsüla.
Iba Workshop sentong ayongzükba ajanga Naga nunger dak art meimba shisatsü aliba maparen sayuogo, ta Alemtemshi-i shisem. Paisa, iba workshop takok ngua agitetba atema artists aser trainers den shilem agirtem nem tenüngsang agüja liasü.
Kasa sentong nung Director of Admission, SCAD Hongkong, Pelesino Ane Kevichusa-i, SCAD University semdangtsü atema shimmer tenüngtem sangdonga liasü. Item rongnung, Ruokuoselhou Miacheio, H. Akup Buchemhu aser Neiphrezo Ezung densema lir.
January 22 nungi tenzüka 31, 2019 nü tashi ayonga agiba workshop sentong nung parnok nisung 11-i shilem agia liasü. Iba workshop sentong atema master trainer temji artist & master trainer, Viveek Sharma aser assistant trainer, Ajit Nagarkar na liasü, ta kasa sangdong ajanga metetdaktsü.