Pope dak tekolok tumor mali: Vatican

Vatican City, October 21 (Agencies): Italy nung osangkaket ka ajanga Pope Francis dak tekolok nung tumor tila ka lir, ajisüaka ibaji taneptsü ngutettsü ta sangdongba, Vatican-i aitsüogo.

Vatican otongdar, Rev. Federico Lombardi-i, “Osangkaket nung Bodhbar nü sangdongbaji teyazü aser iba osangji tenoka amangtsü tenüngdaktsü mali. Pope anema lir aser akhi ama pa teinyaktsütem menani inyakdar,” ta sangdong ka ajanga ashi.

Lombardi-i, “Osangkaket nung Pope Francis Tuscany tashi helicopter nung ao, ta shia alibaji kenyongi teyazü osang lir,” ta The Associated Press den jembidang ashi.

Iba osang sangdongba osangkaket ajanga ashiba agi, tawa tanü ang Pope Francis Pisa anasa aliba San Rossore di Barbaricina clinic nung oa Japan nunger doctor Takanori Fukushima den ajurutep.

Osangkaket ajangasa, Dr Fukushima-i Pope tekolok nung tammang telong tilaka alibaji surgery magiyonga ajungtsü, ta sangdong, ajisüaka parnoki iba osang kechi nungi angashiar ibaji shia mali.

Iba osangkaket indang yimozülur, Andrea Cangini-ia iba otsü nung pu asemer.

Hospital director dang email ka ajanga iba osang dak sentakba nung osang tejangja asüngdanga liasü saka pai ano kecha majem.