Pope Francis anemsü Khristantem aitsür

Vatican, February 24 (Agencies) : Pope Francis-i Khristan tesayuba ama pei taküm maliba Catholic purtem dang anemsü nisungtem ta aitsüogo.
Tamangba yimsü tesayuba sülen manidakba tamangertem dang nungibo tsüngrem mamangertem tajungba, ta paisa ashi.
“Tebang agi jembiba aser mapa inyakba na meputepba dangji maaksü mapa ta ajar, iba dangji taküm ana aliba ta ajatsü. Ni kanga Catholic, ni teti Tekülem sentepi aoer, ni iba telok nung aden, saka kü takümbo Christian masü, ni kü mapa inyaker nem taa magütsür, ni nisungtem dang nung tajangzük bushir, ni ozüngi memelaba shishilembar, ni sen mashi amshir. Iba dangji taküm ana aliba ta ajar” ta Pope Francis-i jembiba onük ka Vatican Radio-i Brihostibarnü metetdaktsü.
“Khristan aikati iba taküm ya alir. Iba ama taküm ana alidang nungibo, tsüngrem mamanger ka asüba tajungba” ta paisa shisem.
“Nenok kotak atongtsü aser kishi nung akoshia, ‘Tsüngrem ni yangi lir, ni tenlaki dangi ao, ni nü den tesentaktep tajung ayu, ni iba arogo nung züngsem ka liasü, ni nü nem tenla agütsüba nai bilemteter asü masü?’ ta nenoki ashitsü,” ta Pope-i ashi.
Ajisüaka, Yisu-i “hao, ni na bilemteter. Nai tenla agütsüba ni meteta lir, saka senji sensakertem dang nungi auyazükba liasü. Ni na memetet” ta langzütsü, ta paisa shisem.
“Khristan ka tasü asüba tetezüji, Tsüngremi mulungba ama inyaktsüba lir. Khrista indang azü ajanga Tsüngremi asenok ajak alangzük, Catholic tem dang masü saka nisung ajak Pai alangzükogo. Tsüngrem dak mamangertema dena lir. Asenoki tajung inyaktsüla aser Khristan tamanger tajung ka ama asen taküm alitsüla. Ibaji asü nungdang tatem anogo nung asenok nem kotak kishi lapoktsütsü” ta Pope Francis-isa ayongzük.