Pope Francis-i Auschwitz semdangogo

Warsaw, July 29 (Agencies): Alima ajunga nung Roman Catholic tamangba yimsü benshir lenisang, Pope Francis-i Poland nung tentetba tepuokdak, Auschwitz-Birkenau tanü, Hokolbar nü semdangogo.
World War II (WW II) nung Germany lenisang, Adolf Hilter-i aniba Nazi sepaitemi Auschwitz-Birkenau tepuokdak puoka ayurtem talisa, Yihuda nunger nisung million 1 dak tema tepsetba osang bushiteta lir.
Francis-i tanü Auschwitz-Birkenau semdanga, ‘Mapa agi na nüchi nisung kümdaktsür’ ozülu alenokba kikümbang ajangdanga ia tang azüngmeyaka aliba tepuodak ola madoki shisadanga mapang süidakja liasü.
Tesülen, pai ‘Death Wall’ ta ajaba tepuokdak puoka ayurtem tepsetdak mombati tsükloka asürtem nem aküm agütsü.
Francis-i Auschwitz-Birkenau tepuokdak semdangba sülen kasa tepuokdak tesüiba mapang puoka ayur aser tanü tashi taküm alirtem den tsüngdong ajurutepba osanga angazükogo.
Francis-i anogo 5 agia tan Poland semdangdang, pai anogo tasembuba nung Auschwitz-Birkenau tepuokdakji semdanger lir.
Francis ya Poland anülulentip tsütsülen tentetba Auschwitz-Birkenau tepuokdak semdanger Pope tasembuba lir.
Taoba mapanga John Paul II aser Benedict XVI natia 1979 aser 2006 küm Auschwitz-Birkenau tepuokdak semdanga liasü.
Ano külen, Francis-i Pope akümba sülen tan mezüngsüa Eastern Europe semdanger lir.