Pope Francis-i Cuba o US na bushiaogo

Pope Francis-i Cuba bushia aotsü asoshi Rome yimti nung tentetba tayimtsü anendak tonga aoba sülen Italy nunger Carabinieri paramilitary police ketdangser kati pa den teka amtepa ajuruba noksa nung angur. (Rome, September 19)

Rome, September 19 (Agencies): Alima ajunga nung Roman Catholic tamangba yimsü benshir lenisang, Pope Francis-i anogo 10 agia semdangtsü nükjidong nung kidangsüa aliba Cuba o United States (US) linük na tanü Honibar nü bushiaogo.
Francis-i ayonger külen küm 50 dak tema tesendaktep mejungi aruba Cuba o US nati tanaben sentaktepshitsü lemtet aser tanübo par linük ana tsüngda tesendaktepji taoba mapang nungi kanga agi tajungba kümogo.
Cuba Tir, Raul Castro-i Francis Havana kübok Jose Marti International Airport nung pela agizüktsü renemba osanga jangjaogo.
Aji oda, Francis-i Havana yimti tonga aoba sülen idakji tentetba Revolutionary Square nung mass sarasadem sentong asüng, Deobar nü anitsü sentong renema lir.
Tesülen, Francis o Castro nati ajurutepa senden ka amentsü renemba osanga angazükogo.
“Francis-i anogo 3 agia Cuba semdangdang, Cuba kübok densemba Hoguin aser Santiago yimti nata semdangba den külemi, iba yimti ana nung alir Catholic lenirtem den ajurutepa mass sarasadem sentong agitsü. Iba sülen Francis-i Washington bushia aotsü,” ta Vatican-ia metetdaktsüogo.
John Paul II-i 1998 küm aser Pope Benedict-i 2012 küm semdangba densema Francis ya küm 20 tsüngda nung Cuba linük semdanger Pope tasembuba lir.
Ano külen, Francis-i Washington tonga aoba sülen US Tir, Barack Obama den ajuruteptsü, US Congress aser New York nung amentsü ayongba United Nations (UN) senden nung o jembitsü aser Philadelphia yimti nung ayongba World Meeting of Families sentong nung shilem agitsü sentong renema lir.