Pope Francis-i Mexico 2016 February ita semdangtsü

Mexico City, November 02 (Agencies): Alima ajunga nung Catholic tamangba yimsü benshir lenisang, Pope Francis-i sangküm, 2016 küm February ita Mexico semdangtsü sentong renemba osang ka Mexico nunger Cardinal, Noberto Rivera-ia tanü Hombar nü metetdaktsüogo.

“Pope Francis-i Mexico sangküm February ita semdangtsü sentong renema lir,” ta Rivera-i ashi saka Francis-i Catholic tamangba yimsü benshir nübur jenti alidak, Mexico koba anogo nung semdangtsü iba osang tejangjabo pai memetetdaktsü.

“Cardinal Rivera-i sangoktsüba ama, Pope Francis-i Mexico sangküm semdangtsü jangjashitsür,” ta shia, Archdiocese otongdar, Carlos Villa Roiz-i osang jangjashitsüogo.

Paisa ashiba agi, Francis-i Mexico semdangtsü den sentakba nungdakba maparen ketdangsüa awashitsü asoshi Vatican ketdangser ka Mexico kobi meli tonga aotsü.

Francis-i sangküm Mexico semdangdang Mexico nung lendong atalokba aser sorkar nungi temelaba magi bendang linüktem nung jenoka alir migrant nisungtem den sentakba onüktem benoktsü sentong renemba osanga angazükogo.

Taoba Pope, Benedict XVI-i Mexico March, 2012 nung semdangba sülenbo Pope kati danga Mexico tanü tashi semdanga mali.