Pope Francis-i Mother Teresa dang ‘Temeshi Nisung’ ta jaloktsüogo

Vatican City/Kolkata, September 04 (Agencies): Tanü Deobarnü Vatican City nung sentong ka ayongzüka Pope Francis-i Mother Teresa ‘Temeshi Nisung’ ta jaloktsüogo.
Mother Teresa nem iba naroküm agütsüba sentongji Vatican City nung aliba St Peter’s Square nung agia liasü.
Mother Teresa-i Kolkata yimti lenmangtem nung sensakertem aser lenimaortem atema bendanga agüja tenzükba ajanga alima nung la nüngtugu ‘nun’ ka aküm.
Deobarnü iba sentong nung nisung 100,000 dak tema dena liasü.
Mother Teresa arishi küm 87 asüdang alima nungi pilar küm 19 ajüngtsü lia la nem iba nüngja jaloktsüogo.
Missionaries of Charity tentetla aser Kosovar Albanian apuani jala, Teresa ya taoba mapang Ottoman yimli kübok Skopje (tang Macedonia yimtiba) nung aso aser 1979 küm la nem Nobel peace prize agüja liasü. La ya Khristantemi taküm bendanga agütsüba aser tenla mapa inyakba nung tatishitsü agia amshir.
Teresa sür iba dak sentakba nung Roman Catholic Church nung sayatenya ana atalok, iba nungji ajemdaker la nem ‘temeshi nisung’ ta tenüng jaloktsütsü maparen tenzüka liasü.
Mezüngbubaji Bengal, South Dinajpur district nung tribal tsür ka tenüng agi, Monica Besra sayatenya agi taneptsü anguba sülen Teresa nem iba naroküm agütsütsü atema 2003 küm maparen tenzük. Monica dak cancer akümtsüsa ovary tumor liasü saka Missionaries of Charity nung nun temi sarasademba ajanga 1998 küm taneptsü angu.
Tamalen interview ka agidang Monica-i, lai Mother Teresa noksa ka angu aser tenüka apoktsüsa tesangwa ka yalok. Iba mapang nun temi tamangba yimsü oset ka la tepok nung nemoktsü aser ghonda ishika sülen la saakdangbo tashidak aneper saak.
Besra taneptsü angubaji Vatican-i agizük aser 2003 küm Teresa nem “Blessed Teresa of Calcutta” ta jaloktsü.
Tanabuba sayatenyaji, tamalen Teresa-i sarasademtsüja ajanga Brazil nung nisung ka sayatenya nung taneptsü angu. Brazil nunger Marcilio Haddad Andrino tekolok tashidak nungi taneptsü angu, koba ajanga Teresa-i iba naroküm angu.
Ano, Kolkata nungi tanga osang ka nung tanü Pope Francis-i Mother Teresa ji temeshi nisung ta sangdongba sülen West Bengal Chief Minister, Mamata Banerjee-i twitter ajanga lai Vatican City nung Pope Francis nem Bengali nunger Baluchuri silk-i Laishiba ka aleper sempet agütsüogo, ta metetdaktsü.
Tanü Vatican City nung iba sentong nung Foreign Minister, Sushma Swaraj leniba nung Centre nungi telok ka, Chief minister Arvind Kejriwal leniba nung Delhi nungi telok ka aser Mamata leniba nung Bengal nungi telok kata dena liasü.
Mamata-isa, Missionaries of Charity nung Superior General Sister Prema aser Kolkata nung Archbishop nati Temeshi kaketji Pope nem agütsütsü, ta ashi.