Pope Francis-i South America semdangtsü tenzüker

Vatican, July 06 (Agencies): Alima ajunga nung Roman Catholic tamangba yimsü benshir lenisang, Pope Francis-i yashi, Deobar nü nungi tenzüka South America kübok densemba Ecuador, Bolivia aser Paraguay anogo 8 agia semdangtsü tenzükogo.

Arishi küm 78 tain Francis-i Ecuador  yimtiba, Quito yashi tonga aoba sülen Ecuador sorkar aser arogo lenirtemi pa pela agizüka liasü.

Francis-i pa anenzükdak, Papal nuncio alidak bushia aodang pa jajaba lenmang sünga nüburtem nokdakteper Francis pela agizüka pa nem aküm agütsü.

Tan South America semdangdang Francis-i par Argentina linükbo mesemdangtsü kechiyong pai par linükji taruba 2016 küm ang semdangtsü sentong renema lir.

Tan South America semdangba ya densema Francis-i küm ana tejaklen nungi tenzüka Pope menden benokba sülen tan agi 9 benbuba tashi bendanglen semdangtsü sentong agir lir.

Tan Ecuador, Bolivia aser Paraguay nunger semdangdang, linük asem indang nüburtem talisa, kechisarena nungdaka aliba tila tanurtem, tantsür tamburtem, shiranga alirtem, meshimejungi alirtem, sensak tia nung alir aser iba amala tangar memenepertem indang taküm jenjang temalen ajungkettsütsü asoshi alizüng ayuba osang ka Francis-i Rome toktsüba jakdang metetdakja liasü.

Alima ajunga nung Roman Catholic tamangba yimsü benshir billion 1.2 shi aliba osang bushiteta lir aser parnok timbaka Latin America nung aliba osanga jangjaogo.

Ano, Ecuador, Bolivia aser Paraguay nunger ya South America nung tentetba linük rong nung tilatiba aser sensaktiba jenjang nung aliba linük asem lir.

Francis-i Bolivia semdangdang idakji tentetba tepuokdak ka aser Bolivia tesem balala nung jana bendenertem den ajuruteptsü sentong renema lir.

Pai Paraguay nunga tzümetsüng lendong ajurushia alirtem den ajuruteptsü  sentong yanglua lir.