Pope Francis-i Ukraine nüburtem asoshi senotsü bushitsür

Vatican City, April 03 (Agencies): Alima ajunga nung Roman Catholic tamangba yimsü benshir lenisang, Pope Francis-i Europe ajunga nung tentetba Catholic arogotemi Ukraine nüburtem asoshi tenla tajung agütsütsü tajungshiba olen ka tanü, Deobar nü metetdaktsüogo.
Ukraine nung tongpang kanga sashia raraba ajanga timtem toushi ajurua alir nüburtem, talisa tambur tantsür aser tila tanurtem yaritsü nükjidong nung Ukraine nüburtem asoshi talila tenla tan April ita 24 nü sarutsü asoshi Francis-i sentong renema lir.
“Ukraine nung mangatettep adoka tongpang kanga sashia raraba ajanga nisung meyirijang jenti süogo. Ano, nisung million aikati pei talidak toktsüogo aser pei talidak metoktsüi alirtemi tebang agi meshitetba timtem toushi jenti ajurua lir. Anungji, Europe ajunga nung tentetba Catholic arogotemi Ukraine nüburtem yaritsü asoshi tenla tajung agütsütsü ajungshir,” ta Argentina nungba, Francis-i tanü sangoktsü.
“Ukraine nüburtem asoshi sarasadem nung bilemtettsüba den külemi, parnok nem nungdakba senotsü bendentsütsü lemtetba sülen ni iba osang ya sangdonger,” ta Francis-i osang jangjashitsü.