Pope Francis-i ‘Wake Up!’ kensep tasen ka sayatsü

New York, September 28 (Agencies): Alima ajunga nung Catholic tamangba yimsü benshir lenisang, Pope Francis-i ‘Wake up!’ ta ajaba pop-rock kensep tasen ka sayatsü renemba osang jangjaogo.

“Francis-i adoktsü renemba ‘Wake Up!’ kensepji taküm November ita 27 nü nungi tenzüka nüburtemi angutsü,” ta shia, iba kensep nung Francis-i English, Italy, Spain aser Portugal nunger oshi densema oshi balala nung o jembiba onüktem nungi shilem kar agiteta yangluba kensep ka lir ta Believe Digital teloki metetdaktsü.

Francis-i mejema yangluba ‘Wake Up! GO! Go! Forward!’ mezüngbuba singles ken Rolling Stone’er website nung tan mezüngsüa taoba Hokolbar nü maloktsüba osang jangjaogo.

Francis’er ‘Wake up!’ kensep ya iTunes nungi agizüka angatettsüsa renemtsütsü sentonga renema lir ta osangi ashi.

Pop nungi rock aser Latin olusü balala amshia yangluba ken 11 densemba kensep nungi yokzükba senji pei linük toktsür bendang linük balala nung jenoka alir refugee-tem yaritsü asoshi tenlatsü sentong renema lir.

Francis-i tan United States semdanga Washington, New York aser Philadelphia yimtitem semdanga senzüba osanga jangjaogo.