Pope-i February 13, 2016 nü Mexico semdangtsü

Vatican city, December 13 (Agencies): Pope Francis-i, February ita nung pa Mexico-i aotsü aser February 13 nü ‘Lady of Guadalupe’ nem akhümtsübu aser tetushi agütsütsü, ta ashi.
“Ni Mexico-i aodang February 13, 2016 nü ‘Lady of Guadalupe’ jubilee nüngtem nung la külemba tesemi kü mulung ajak agi sarasadema aotsü,” ta Honibar nü Tsüngrem o jembiba mapang Pope Francis-i ashi.
Pai iba o ya Mexico aser America linüktem nung kanga tushia aser akhümtsüba amshila, tasüngtet Mary bejung amungba mapang St. Peter’s Basilica nung adenshia aliba nüburtem dang ashi.
Pope-i America limatem nung nüburtem pelatepa aliba aser ano okrongba ajunga tasüngtet Mary dang shia la dang nüburtem len anitsü asoshi sarasadema liasü.
2013 küm July ita nung Rio de Janeiro, 2015 küm July ita nung Ecuador, Bolivia aser Paragua aser US o Cuba na September, 2015 nung semdangba sülen tan Mexico-i aotsüba lir.
Tesüiba ita Africa lima nungi meyipa aruba mapang Argentina nunger Jorge Bergoglio (Pope Francis)-i pa Mexico-i aotsü atema jembia liasü.
Pai ashiba agi, Mexico city nung aliba ‘Lady of Guadalupe’ indang Basilica-i aotsü aser iba sülen ano, San Cristobal de las Casas, Chiapas, Morelia, Michoacan, aser Ciudad Juarez, Chihuahua yimtitema semdangtsü.
“Ni ama nisung tain ka aienlen jajatsüji tebilemtsü tulu lir ajisüaka ni Mexico nung oa America nunger tetsü den tanela nung sensak asemtsü,” ta pai ashi.
Pai, “Ni danga mapa ka atemabo Mexico-i maotsü mesüra yimti tanga semdangtsü menagzüktsü asü,” ta ashi.
Pai ashiba agi Brazil nungeria 2017 küm ‘Lady of Aparecida’ nem tetushi agütsüba sentong nung adentsü asüngdang, ajisüaka ibaji sentong asoshi ano kecha tatem küma mejembi.