Pope-i Russian Orthodox Church Patriarch den Cuba nung ajuruteptsü

Vatican City, February 05 (Agencies): Alima ajunga nung Catholic tamangba yimsü benshir lenisang, Pope Francis-i Russian Orthodox Church lenisang, Patriarch Kirill den Cuba nung taruba hopta ajuruteptsü sentong renemogo.

“Ozü lenisang, Francis-i Kirill den Cuba nung tan February ita 12 nü ajuruteptsü sentong renemogo,” ta Vatican-i tanü metetdaktsü.

Taoba mapang nung Roman Catholic Pope-temi Istanbul nung tentetba Eastern Orthodox Church Patriarch-tem den ajurutepa lir saka tan Francis-i Kirill den ajuruteptsü sentong renemba ya Roman Catholic Pope kati tan mezüngsüa Russian Orthodox lenisang, den ajuruteptsü sentong renemer lir.

Cuba Tir, Raul Castro-i ayongba sülen Francis aser Kirill nati Cuba kübok Havana tayimtsü anendak ghonda 2 shi agia senden amentsü sentong renemogo.

Kirill den ajurutepa senden amenba sülen Francis-i sentong renemba ama, Mexico bushia aotsü.

Francis aser Kirill nati taruba Hokolbar nü tsüngdong ajurutepa senden amenbaji West aser East na nung tentetba Christianity kongsang ana 1054 AD nung pila küm 1000 shi benshiba mangatettepbaren benteta tanaben sentaktepshitsü mera tongti agir asütsü.

You must be logged in to post a comment Login