Pope-i semdangba jakdang Cuba-i tepuokdak puoka alir 3,522 chioker

Havana, September 12 (Agencies): Alima ajunga nung Catholic tamangba yimsü benshir lenisang, Pope Francis-i par Cuba linük semdangba jakdang Cuba-i par tepuokdak puoka alir nisung 3,522 tashi chioktsü renemogo.
Tan tepuokdak puoka alir chioktsü renemba ya densema, Cuba-i tan agi tasembenbuba tashi Pope-i par linük semdangba nüngtem nung par tepuokdak puoka alirtem chioker lir.
“Pope Francis-i ozü Cuba semdangba nüngtem nung ozü sorkari tetsür, arishi küm 20 tain den tekübokpur, tashidak balala agi shiranga alir aser sangküm 2016 küm tepuokdak puoka merenshibaren tembangtsü alirtem densema ozü tepuokdak puoka alir nisung 3,522 tashi chioktsü renemogo,” ta Cuba’er Council of State-i tanü osang jangjashitsü.
Ajisüaka, nisung tepsetba, tila tanur taküm tashiyim agi raksatsüba aser linük nem lendong bener arutsütsüsa ozüng alema inyakertem dangbo iba taochi ya mesayutsü asoshi Cuba sorkari lemteta lir.