Pope mulung yirutsüsa jembiba ajanga Hrithik Roshan anema ken o ka benokogo

March 30, 2016: Sussanne Khan den balaba sülen osangbener balalai Hrithik Roshan actress aika den medemer ta olulu aika adoktsüba ajanga pai, “item tetsür den medemtsü melena Pope den ang medem tajungba asütsü” ta ashiba mapang Hrithik-i kanga shisa ka-a langzüogo ta bilemer alitsü akok.

Aji oda süaka iba o jagi pa lendongi iogo, kechiba süra State Minorities Commission nung Vice Chariman Abraham Mathai-i pa anema ken o benokogo.

Mathai ya Indian Christian Voice telok nunga Tir lir.

Tamangertem rongnung lenir ka atema iba ama magizüktettsü o jembia tamangertem temulung yirudaktsüba ajanga Hrithik aitsü.

Hrithik-i January 28, 2016 nü twitter nung tamendakdak makaba aser nüngdak makaba o züluba anema Mathai-i Indian Penal Code (IPC) Section 295A nung ajemdaker iba ken o benoka lir.

Iba ken o ya-a Kangana Ranaut aser Hrithik na ken o nung Kangana o katsür Rizwan Siddique-i dangi yok.

IPC, Section 295A nung kari talangka bilemdanger mesüra asa-a o mesüra tezüluba den yimya balala ajanga linük nübur mashi ka tamangba yimsü anema benshira tepuokdak küm asem ayutsü mesüra senchi achitsü mesüra anaprong agi merenshitsü ta shia lir.

Interview ka nung Abraham Mathai-i, “Hrithik Roshan-i nisung mashi ka den medemtsü pa dak temeten lir ajisüaka pai Pope tenüng tetshitsü temeten mali. Pai jembiba o ajanga Pope ji eunuch (gay) ama kümtsür. Ni Roshan dang kanga junga taitok meshitsü shiogo. Pai jembiba o ajanga Pope-i aniba Catholic telok temulung kanga yirutsüogo,” ta ashi.

Kangana Ranaut den Hrithik tena ken o atema interview ka akaba sülen telangzüba ka agütsüba mapang Hrithik-i item o ya twitter nung zülua liasü.