Porbami tetsürtemi KhuKhu Nyie benjong amung

Kohima, Luroi/August 12, 2019 (TYO): State Academy Hall, Kohima nung August 12, 2019 Hombarnü Porbami Social Club, Kohima Women Wing-i 2buba KhuKhu Nyie benjongmung sentong ayongzüka munga liasü.
Iba sentong nung Kohima Science College, Jotsoma, Asst. Professor, Shepolu Yhor alakteta jaoker ama aruagi dena liasü.
Iba benjongmung nung jembiba mapang Yhor-i, Porbami nüburtem dang aser talisa tetsürtem dang pei kin indang akhi tejen sobalibatem wazüka ayutsü aser ajungkettsütsüla, koba tetsü-tebou mapang parnoki ochi tanüla nung sobaliba tajungtem benshia aru, ta telok ajungshi.
Ochishia aser tesandaktep tajung nung alitsüji kanga dang tongtibang, kong akhi tsüraburi benshia aru, ta asüba olen nung ajemdaker, Yhor-i, tanü putu nung nüburtemi tetsü-tebou mapang benshiba sobaliba tajung samaodaktsüba ajiteter, koba ajanga asenoki iba ama sobaliba tajung ya jenjang tuluka ama benshitsü yimya süpatsüla, ta ashi.
Laisa, lokti ka nung telongjem tajung alitsü asoshi nübur tsüngda temeim sayuba aser kati ka akhüm tsübutsüji kanga dang tongtibang shilem lir aser iba ama yimya den sobaliba tajungtem ya asen tsürabur mapang parnokibo kanga dang metsüngareta amshia aru, ta ashi saka item sobaliba tajungtem sama aoba ngua sasa bilemba indang lai lemsatep.
Anungji, iba ama jenjang tulu aketba aser asen sobaliba tajungtem ya lanurtem dang sayutsüla, ta Yhor-i Porbami tetsürtem ajungshia liasü.
Iba ama benjong tajung ka akhüm keta ayongzükba asoshi Porbami Social Club, Kohima – Women Wing dang Yhor-i pelaba metetdaktsü.
Khukhu Nyie benjongmung ya tanü putu nungbo Tsüngrem bushitsü nükjidong nung ayongzüker koba akhi tejen putu mapang nung, Khristan yimsü marudang pei talidak/yimtsüng nunger nung lendong nungi kümzüka ayutsü, tzü-mopung aser anentsüh ajanga alu nung tsünüsembongtsü raksatsüba aser iba denji külemi lendong balala nokdangtsü asoshi ‘goddess’ külema liasü. Iba benjongmung ya nüngdakba nüburtem dang temeim mapa sayutsü asoshi lir, koba item mapa tajung melena Tsüngremi ano nübur tali dang moatsütsü, ta sentong achaayangertemi ashi.
Maneni, iba benjongmung sentong nung, sobaliba saisapongtem sayua liasü, kong küm 12 tekübok tetsür tanur tem nem maongka timba agüja shilem agidaktsü. Iba denji külemi, saisapong balala nungi asaya ka atemba sülen item tetsür nem 5ben dak tema chiyongtsü tem anepalua chidakja liasü.
KhuKhu Nyie benjongmung sentong nung, tanur aser tain sentepa nisung 200 aruagi denogo aser item rongnung tetsür timba liasü. Sentong nung Kudulu Vadeo menden liasü. Tsüngremer temoatsü meshia Vehutso Dzudo-i sarasadem. Khukhu benjongmung dak sendakba nung ajemdaker Zaveculu Chiero, Niesahulu aser medemertemi telok saksalemdakja liasü. Sentong tembanga Zhovelu Dzudo-i sarasadem.