Portugal PM-i Modi nem ‘CR7’ Jersey agütsü

New Delhi, January 08 (Agencies): Linük ana tsüngda o lemtep agiba sülen Portugal Prime Minister Antonio Costa-i par linük nung football asayar nungtügu, Cristiano Ronaldo indang jersey ka PM Modi nem sempet agütsü.
Temerem sentsü jersey nung Ronaldo indang züngdangba ‘7’ keta lir aser iba tola nung Ronaldo-i pasasa sign süa lir. Costa ya India nung anogo 7 amongtsü asoshi arua lir.
Portugal nung football asayaba tashi aser India nung saisapong kanga karaa renloka aoba ajanga saisapong nung tesentaktep tajung yanglutsü, ta PM Modi-i metetdakja liasü.
Linük ana tsüngda football asayaba renloktaktsütsü asoshi mapa aika asayameyanga asüba atema lennir anati pela agizüka liasü.
Ronaldo ya football asayar mongin lir aser pai Spanish club Real Madrid aser Portugal national team nungi asayar. Alima nung tebur football asayar tajungtiba nem agütsüba sempet, Ballon d’Or sempet Ronaldo-i pezüben tashi ngua lir.