Poshan Abiyan dak sendakba baby show sentong agi

Dimapur, Rongjui/September 22, 2018: Poshan Abhiyan programme dak sendakba nung tanü Ana Ki, Kids worship Center, Dimapur nung Baby Show nung takok angurtem den tsürabur aser tetendangertem külemi tangokba noksa nung angur. 

Dimapur, Rongjui/September 22 (TYO): Poshan Abhiyan programme dak sendakba nung tanü Ana Ki, Kids worship Center, Dimapur nung Department of Social Welfare Dimapur district-i baby show sentong ka ayongzüka agiogo, ta ketdangsertem osang ka ajanga metetdaktsü.
Iba sentong nung kinü tanur 87-i baby show tetoktepba nungji shilem agiogo.
Iba sentong nung tetushi tejaoker, Director Social Welfare, T. Merangtsungba Aier-i, tanur kaji temang touzük aser tar na sütep-sütepa aintsüla, ta ashi.
Tanur ka nem immunization ajak agütsüra tanur ka ainba nung alizüng ka tongteter, ta paisa ashi.
“Tanur tetsü ka anema-alibarenji kanga tongtibang, kechiyong ibaji ajanga meimchir ka taküm nung tongtibang shilem ka agir. Tanur tebok nung abenba anogo nungi tenzüka arishi küm 2 tashi chiyungtsü shidak agutsütsüla aser tanur tetsü ka anema-alibarenji-a kanga tongtibang,” ta pai shisem.
Kasa sentong nung State Ambassador, Rashtriya Poshan Abhiyan, Prof. Alongla P.Aier-i tsüraburtem dang pei chirnur junga anepalutsüla; tsürabur ka asübaji akhümket aser maongka tajung ka lir, ta ashi.
Laisa, temang anema aliba tanur kaji lokti aser linük naprongla atema tajung asütsü, ta ashi.
Poshan Abhiyan dak sendakba nung iba ama sentong ayongzükba atema lai Social welfare department dang pelaba lemsatepa liasü.
Sentong nungsa Deputy CMO, Dr.Antoly-i mashisa aliba tetsütem dang hospital bushia oa tanur asotsü ajungshiba den külemi tetsütem dang tanur arishi ita 6 tashibo tetzü mamatzü dang agutsütsü ajungshi.
Laisa tanurtem nem vaccine agütsütsü ajungshia liasü.
Baby show tetoktepba nung Imnajungla Mollier-i mezüngbuba jenjang nung takok angu aser la nem senpet 5000/- den citation agutsü, aser tanabuba jenjang nung takok angur Akili K.Jimomi nem senpet 3000/- den citation agutsü. Tasembuba jenjang nung takok angur ana- Kechetyile aser Temsuakum nem sen 2000/- den citations agutsü.
Sub- category balala nung takok angurtemji:- Best Smile-Veyie Tetseo, Best Dressed-Likhumgha Zhimomi, All Round-Ninuka Aye, Most Healthy Baby- Lendisen, Most Active baby- Mathew liasü. Parnok shia nem senpet 1000/- den citation agutsü. Iba dak alia shilem agir tanur ajak nem sen 500 den citation agutsü.
Baby show tetoktepba nung tetendangertemji- T.Merangtsungba Aier, Director Social welfare, Professor Alongla P.Aier, State Brand Ambassador, Dr.Antoly Swu, Dy.CMO, H&FW, Tosheli Zhimomi, District Welfare officer, Dimapur aser Dr. Akumtoshi, Pediatrician (Zion Hospital, Dimapur) nunger liasü.
DPO (ICDS Dimapur) S.Nezolu Rakho-i lokti pelaa agizükba o jembi aser CDPO Niuland, Akali Sema-i tepela anküp o jembia liasü.