Post office 2,590 nung core banking facility lir : Ravi Shankar

Agartala, July 12 (Agencies) : Reserve Bank of India (RBI)-i September ita nungang Department of Posts (DoP) nem payment bank licence agütsütsü imlar saka linük nung core banking facility aliba post office 2,590 lir, ta Deobarnü Communication & IT Minister, Ravi Shankar Prasad-i ashi.
Deobarnü Ravi Shankar-i Agartala Post Office indang core banking service lapoktsü aser iba den külemi video conference ajanga Nagaland nung Dimapur Mukhya Dak Ghar yanglutsü atema lung azüngtsü.
“Post office ajanga makamaiter nem teyari agütsütsü atema ni temelenshi bener arunür. Onoki RBI dang payment bank licence meshiogo” ta Union Minister-i ashi.
Mezüngbo core banking facilities aliba post office 236 dang liasü, saka yaküm NDA sorkar aruba sülen post office 2,590 nung core banking facilities lir, ta paisa ashi.
“Ni Indian post office ajak ajungketnür aser digital facilities lidaktsünür. Yimti nung alir kati post office ajanga yimtsüng nung aliba tetsü dangi sen yoktettsüsa inyakyim melenshinür. Yimtsüng nung aliba community centre nung inyaker tetsürtemi digital facility ajanga doctor tajungtem den tongtepratepa medical teyari agidaktsünür” ta tanü Ravi Shankar Prasad-i metetdaktsü.
Centre sorkari linük ya Digital India kümdaktsünür aser iba nung sensaker katia smartphone amshitsü aser tanü-asüng anguba facility tem agidaktsünür, ta paisa shisem.
“Tang linük nung mobile phone crore 98 amshir aser kobi melii crore 100 ajungtsü. Ano kobi melii linük nung internet connection crore 30 ajungtsü. Linük nung aliba gram panchayat ajak optical fibre ajanga sendakteptsü” ta Prasad-isa metetdaktsü.