Postal shidi züluba tetoktepba nung Aboli-i takok angu

‘Dhai Akhar’ shidi züluba tetoktepba nung takok angula, Aboli Wotsa-i Head of Nagaland Postal Division, Lalramzauva ket nungi sempet agizükba noksa nung angur.

Kohima, May 03 (TYO): North East circle of India Post kübok arishi küm 18 ser temapur Envelope Category nung ‘Dhai Akhar’ shidi züluba tetoktepba nung Dimapur nungi Aboli Wotsa-i takok angu, ta ketdangsertemi metetdaktsü.
Tanü Kohima nung sentong tilaka ayongzüka Superintendent of Post Offices, Head of Nagaland Postal Division, Lalramzauva ket nungi Aboli-i senpet 25,000 den citation agizük.
Teka agi olong 1000 agi shidi züluba tetoktepba ya yaküm June 15 nü tenzük aser submission atema tatembangbuba anogoji September 30, 2018 liasü. Iba tetoktepba omenji Rabindranath Tagore indang sangro “Amar Desher Mati” agi ajungshiba “Letter to my motherland” liasü.
Wotsa ya tesayur ka lir aser lai zülutsü jangraba den külemi lai tesaputiba sangro mejemerji Tagore lir.
2017 küm Mahatma Gandhi nüngtem nung “Bapuji, you inspire me” – Inland Letter Card Category nung olong 500 agi otsüno zülutepba tetoktepba nung Wotsa-i tanabuba jenjang nung takok ngua liasü.
Wotsa ya New Life Academy, Dimapur nung Principal lir aser lai English nung MA aser M. Divi (Theology) agiogo.
Iba takok anguba atema Tsüngrem tenüngsanga lai, “Shidi zülutepbaji ni asoshi tejangraba ka lir, kechiyong ni school mapang nungi osettsüset dang nungibo pen aser paper jangra,” ta ashi.
Shidi zülutsü ya kanga tongtibang ta shia Assistant Superintendent of Posts, E Yanthan-i, “Nai nisung kar taküm nung kongshinüra parnok dangi shidi zülua yokang,” ta ashi.
Community technology ainba ajanga pei sasa rasa-a shidi züluba ya tongtibang masü ama kümdaktsüogo, ta Yanthan-i ashi.
Lanurtem rongnung shidi zülutepba sobaliba ajungkettsütsü atema department of Posts, Government of India-i shidi zülutepba tetoktepba ya tenzük, ta paisa metetdaktsü.
Aboli Wotsa-i North East Circle level tetoktepba nung takok nguogo aser national level tetoktepba atema lai züluba shidiji yoktsü, ta paisa metetdaktsü.
Award agütsüba sentong ya Nagaland Postal Division Market Executive, L. Imtikumzuk leniba nung agia liasü.