Power Department-i mapa meinyakteter : MCCI

Dimapur, August 16 (TYO): Nagaland nung Power Department-i mapa junga meinyaker, ta Mokokchung Chamber of Commerce & Industries (MCCI)-i sangdong ka nung metetdaktsü.
July 15, 2016 nü Mokokchung Power House nung 5MVA power transformer raksaba sülen Mokokchung nung power mengui timtema arur. Küm ka tsüngda, tan agi tanabenbuba transformer raksa aser nübortem timtemba den külemi shishilembartem takoksa jenti ajurur, ta MCCI Tir, Tsukti Longkumer aser Tongti Tezülur, Limalenden Longkumer nati sangdong nung shia lir.
Mokokchung jila aser temeket nung ita ka dak tema power supply shitak mangur aser iba ajanga shishilembartem sen crore aika akoksaogo, ta MCCI mendenpurtemisa ashi.
Iba onük nung MCCI-i Ao Kaketshir Mungdang, All Ward Union Mokokchung Town aser Mokokchung Town Lanur Telongjem nungertemi ashiba pusema nungiter, ta mendenpurtemisa metetdaktsü.
Department of Power, Government of Nagaland-i Mokokchung nung power supply shitak agütsütsü atema inyaker ta ashir saka parnoki mapa meinyaktetba aser inyaktsü makokba nisung ajaki metetogo,  ta MCCI sangdong nungsa shia lir.
August 8, 2016 nü All Ward Union Mokokchung Town-i department nem anogo 15 mapang latettsüba tsüngda mapa inyaktsü imlar. Ajisüaka, iba sülen koda masüba tensa kar ajurura department-i iba tebilemtsü khuret abentsü, ta MCCI-isa metetdaktsü.