Power Department-i sangdonger

Kohima, January 28 (TYO): Tanü Chief Engineer (D&R) Power Department, Er. Khose Sale-i sangdong ka ajanga, light indong o indong na tsüngda cables, süngzü aser pipe mesangdaka ayuba ajanga light yanglushiba maparen nung timtem agutsüba dang masü saka light yanglushirtem taküm-a lendongi yoker, ta metetdaktsü.
“Electricity dak sendakba mapa ya lendong aketba mapa ka lir, anungji item lendong ajema kümdaktsütsü atema tang nungibo jila telongtet nung light indong o indong na tsüngda cables, süngzü aser pipe mesangtsü memelar. Electricity Act, 2003 kübok Arrla 53 sub-sections 1(a) ajang-a memelar,” ta sangdong nung shia lir.
Anungji jila telongtet nung light indong tsüngda cables, wires aser pipes mesanga alibaji iba sangdong agutsüba anogo nungi tenzüka ita asem (3) tsüngda agientsüla, ta kasa sangdong ajanga metetdaktsü.