Power Grid Corp. of India Ltd-i Mkg. Police nem Solar Light 20 agutsü

Power Grid Corporation of India Limited ajanga Mokokchung Police nem Solar Light 20 agütsüba sentong nung Mokokchung Police aser Power Grid Corporation of India Limited ketdangsürtem külemi tangokba noksa nung angur.

Mokokchung, Chiteni/July 22 (TYO):  Power Grid Corporation of India Limited ajanga Mokokchung Police nem Solar Light 20 agütsüba Mokokchung Police-i agizükba sentong Mokokchung Police Station-1 nung July 22, 2022 nü agiogo.

Tanü iba sentong nung Superintendent of Police, Mokokchung, Aotula IPS-i jembidang, Police Department nung kanga dang nungtaka aliba Power Grid Corporation of India Limited-i Mokokchung Police nem Solar Light 20 agütsüba asoshi pelaba metetdakja ashi.

SP Mkg-isa Solar Light-ji Police Station asoshi kangadang tongtipang nungtakba oset ka lir, kechiaser Police station jagi nübur jenti arur aser tongtipangsa anü yiür kelen iba solar light tesangwa atsükba ajanga Police Station nung teyari tulu ngutettsü, ta ashi.

Aotula-isa Mokokchung District nung Police Station 8 tashi lir, anungji item ajak nungji iba teyari ya agia inyakba ajanga Mokokchung Police dang masü saka Mokokchung nübur ajak tajangzük asütsüta, ta shisem.