Power Sun Ventures puri Coolpad nem sen million $300 agütsü

Aenjeti 20, 2018 (Agencies): Senotsü tsütsü timtem aliba China nunger company LeEco den pilaba sülen smartphone yangluba company Coolpad puri Yangtepnü sen million $300 agizükba sangdongogo. Power Sun Ventures puri par company nem iba sen agütsüba sülen Shenzhen nung amendaker aliba company Coolpad puri Artificial Intelligence (AI) tsütsü parnok inyakyim tali atsülanga aotsüba sentong lir, ta company sangdong ka ajanga metetdaktsü.
“Sen teyari lenmang tasen ka nungi anguba sülen Coolpad puri mobile shishilembaba kija nungi AI technology dak rangloker inyakba company ka akümtsü asoshi nükjidong lir. Onoki iba maparen ya AI dak rangloker yangluba applications tem communications, health, education aser gaming nung den bener aruner,” ta Coolpad Group, CEO Jiang Chao-i ashi. China nunger kiojen tsütsü shishilembaba nung tetsüti aser Kingkey Group ngutetsang Chen Hua-i anir Power Sun Ventures ajanga iba sen ya invest asütsü.
Iba ajanga Coolpad India puri taruba ita tem nungi tenzüka shishilemba dak product tasen kar benoka parnok jenjang tashi itshitsü imlar. Parnoki India nung tatembangsa parnok indang product “Cool Play 6” sayaa liasü. 2016 küm company ajanga India nung smartphone ti tashi sayaa liasü. “Taoba küm mepetmesü kar adokba sülen tang jenjang tajungba ka dangi aruogo. Investment tasen anguba sülen Shishilembaba tsütsü inyakyim tasen renema yur India nung asentenshir tenzüktsü asoshi yongyaa atar,” ta Coolpad India, CEO Syed Tajuddin-i ashi.
Iba company ajanga küm shia smartphone million 34 yanglua yoka liasü aser iba ajanga küm shia sen billion $3 tashi aazüka liasü. Online nung market share tsütsü reprangdangra Amazon.in nung Coolpad pur ya temaba jenjang asem nung züngoksema lir.
Osang ajanga ashiba agi, LeEco puri parnok indang stake tesadang dak nungi tali Coolpad Group dang ayok. LeEco pur Coolpad Group dang parnok indang share ayokba sülen sentsüh aoya liasü. LeEco puri tawa China Merchants Bank nem snetsüh million $103.20 aodokogo.