Powercomm pur KFL nung shilem agitsü

Dimapur, August 3 (TYO): Powercomm ya Union Baptist Church, Kohima ministry ka lir. Iba football team ya tanga sentep dak sendakba sentong tem dak alaka arogo lanurtem külemi longjema shilem agitsüba atema tenzükba lir. Iba teloki külemi asayaba kanga jangratema meneni asayaa arudagi. Morning Champions Cup, 2016 tenzükba ajanga parnok o parnok tsüngda dang masü saka tanga telok tem den kasa tokteptsüba tanela temai adoka amshitsü asoshi maongka angu. Powercomm-i iba inyakyim kanga sapu aser maneni Morning Premier League 2017 nung shilem agi aser parnoki iba asayamong akok.
Iba club nung züngsemtem ajak kin balala nungi lir aser parnok iba asaya meimba ajanga parnok team ka ama longjemdaktsü aser tongtibangsa medemer kümdaktsü.
Kohima Town Club-i ayongzükba Kohima Football league, 2017 nung Powercomm pur asayatsü.
Team ketdangsertem yamai alitsü:
Coach – Gum, Assistant Coach- Michael , Manager/Media- Haiyalo , tir – Mele Pucho , tezülur- Dili , senyur – Chiset aser Advisors – Victor aser Jonathan.