PPA-i Citizenship Amendment Bill anema noktaker

Itanagar, Aami (June) 1 (Agencies): Monupii (May) 28 nü Assam nungeri Citizenship (Amendment) Bill 2016 anema lokti lumia lungkak aitba pusema People’s Party of Arunachal (PPA)-ia iba bill aser Chief Minister Pema Khandu-i iba bill atema o mashii jembiba anema lungkak aittsü ta metetdaktsüogo.
Arunachal-i iba bill atema shisa mebulutsüla kechiyong asenok Bengal Eastern Frontier Regulation (BEFR) of 1873 ajanga kümzüka lir ta Khnadu-i tawa tu jembia liasü.
“Arunachal ya BERF 1873 ajanga kümzüka lir asü nung, India sensotema inner line permit melii state telungi maiteter. Anungji Arunachal-i iba bill (Citizenship (Amendment) Bill 2016) atema shisa mebulutsüla” ta pai ashi.
“Chief minister-i zübazüba bill atema shisabulu masütsü ashibaji taoksatsüka lir. Northeast ajungai iba bill anema noktakdang, pai yamai temenünütsü aketba olen jembibaji kanga dang taoksatsü keta lir” ta PPA-i ashi.
“BEFR aliba agi Arunachal nung Chakma refugee tem noklang ishika dang aliba nungi meyirjang aika jungdaktsü asü? Lekang (Namsai) nung non-APST kari parnok dang ILP memeshitsü ashibaji BEFR ajanga asü?” ta PPA-isa asüngdang.
“Chief Minister-i mapang shia Chakma aser Hajong nunger anema jembir. Ajisüaka, BEFR atema pai Tibetan refugee tem indang tebilemtsü atema mejembir asü?” ta parnokisa asüngdangogo.
PPA dak alia lokti tentet ana asem ka aser AAPSU den federal unit kari iba bill anema ola adoker, ajisüaka tanüngba Arunachal nungertemi ola madokba atema süngmanger, ta PPA-isa ashi.
“Citizenship (Amendment) Bill 2016 ajanga Arunachal nungertem pei state nung telok tilaba akümtsü amokmerener saka nübortemi iba bill anema ola madoker. Iba bill agizükra, Chakma, Hajong aser Tibetan nungertem Arunachalee nunger akümtsü atema shisabulua mebilemer asü?” ta PPA-isa metetdaktsü.