PR atar asü ?

Nagaland nung January 28, 2017  nungi government office lapoka mapa meinyaktetter aser government garia kata mesenzüdaktsüi nübortemi nokdanger. Iba tensa tia ya tajung tazü masü. Ibaibo Nagaland apoktsü atema ano bomb tesashika apoktsü renemer amai lir. Iba amai government office melapoktet mapang talangka orra center sorkari reprangtsüsa adoktsü aser idangjibo state government mali küma loksatsüsa akümtsü. Atangji, state nung governori center nem osang magütsü tashibo tapi agi President’s Rule magütsütsü, ajisüaka state government office-tem lapoka mapa meinyaktet tashibo government mali den kasa asütsü. Iba ama terata tia ka nung tang Nagaland government kazüdagi. Iba tebilemtsü ya Urban Local Bodies election agitsüba nungi tenzük aser tia mejungi January 31 aonung Dimapur nung Naga nunger lanur ana khasetba ajanga nübortemi Chief minister, T.R.Zeliang menden nungi alutsüla ta longkak aita takangba agütsüdagi. Atangji, election dak aketba maparentembo government-i ajak ataloktsüogo. Ajisüaka, azü tokshiba lendong atalokba sülen dang government-i nübortemi aginüba ataloktsüba agi nübortemi government dang kecha balaka pelaa mali aser azü tokshiba tai asoshi T.R.Zeliang chief minister menden nungi alutsüla ta akanger. Atangji, tang ajuruba tebilemtsü ya anentsü asoshibo T.R.Zeliang-i Chief minister menden toktsütsüla. Iba jagi tensa süngjemtsü. Nübortemi pa chief minister nungi anentsü akangba kuliji pai NBCC dena Joint Co-Ordination (JCC) den renemba ken o mapa küma meinyaktetba ajanga Naga nunger lanur ana tashi taküm sama ta pa nem tai tongloktsür. Ibajibo paia agizüktettsüla aser chief minister mendenji tangar ka nem agütsütsüla. Tangatettsü kaji, nübortemi government anenang ta akanger masü saka chief minister anentsüla ta akanger. Ashiko, tanga state nung asübo lendong atalokli peisasa menden nungi anener süla. Iba amaisa tangatetba kati maru anogo talangka ao nungbo government nung dang masü saka nübortem rongnunga lendong tulu ataloktsü ana nung lir. Government dak sendakba maparen asünungji yangi political party tapu balala pei pei tangatetba nung dena lir. Ano, nisungtem rongnunga government nung alir pusemertema dena lir. Aji oda, iba ama lendong aketba maparen nung kodang government-i nübortem anema kangshia office lapoktsü merangdir, idangji lendong ataloktsü. Ano, mekümdangra government office shibanga yur Naga nunger o Naga nunger na raratepa ‘civil war’ adoktsü ana nung lir. Iba ama kasa nübortem rongnung azü tokshi mataloktsüsa yakta telemtetba agiadoktsübaji government nung alir yimsüsür tazüngpurtem mapa asütsüla. Nübortemi akangba onüktembo ataloktsütsü saka azü tokshi lendong majuru tashibo tekong merangtsü ta asüba yimsüsürtemji asüng indang bilemba nisung masü. Yimsüsüri pei nübortem bilemba, parnok nüngdak aser taginüba angatettsüla. Itemji mangateti tang amaisa ao nungbo, President’s Rule aru atar amai asütsü. India temzüng arla 356 nung ashiba agi, linük temzüng nung shia aliba ama state ka maparen bener moutetba osang angh nungi arura, tir-i state nung yimsüsüba tashiji agiadoktsü, tetezü Presidents’s Rule asütsü. Atangji, ibaji parliament nung jembia agizüktsü aser agizüktetra ita trok asoshi PR agütsütsü. Aji oda, ita trok tsüngda state nung telatetba tajung kati marutetra ano parliament nung jembir PR mapangji atsülangtsü akoktsü saka PR mapangji küm asem dakbo tali malitsü. Atangji, taoba hopta nung asenoki ” tang ya Nagaland nung PR meshi nunga koma süla ?” ta asüngdangba nung langzür ajaki PR aru nung jungla ta langzüogo. Ajisüaka, parnok telangzübaji reprangdangra, PR aginüba agi masü saka state nung yimsüsür aser ketdangsertem dakbo joko temulung malemer, anungji pei nisung yimsüsür akhüm kübok alitsü agibo PR nung dang linüba purtem lir. PR aru nung dang Nagaland nung ketdangsertemi ochishia inyaktsü amai nübortemi bilemer.