Pradyot-i Tripura nung party tasen ka tentettsü

Agartala, October 23 (Agencies): Tripura nung Chuba tatembangba’er jabaso Pradyot Kishore Deb Barman-i taruba ita political party tasen ka tentettsü.
Iba party tasenba nung Congress aser Indigenous People’s Front of Tripura (IPFT) toktsürtem adentsü akok.
Party tasenba ya November ita tetenzüklen kümtettsü, ta Pradyot den yariteper tajung Ranjit Debbarma-i ashi.
Iba party nung Congress, IPFT aser CPI-M lennirtem den lisopur BJP lennir kar adentsü akok.
Taoba ita AICC general secretary aser Tripura atema party observer Luizinho Faleiro den mangatettep adokba sülen Pradyot-i Tripura Congress Tir menden nungi anen.
Pradyot-i Tripura nung NRC yanglutsü atema takhangba agütsür aser BJP-i benokba Citizenship Amendment Bill magizüker.
Iba onük nung ajemdaker taküm Lok Sabha elections nung pai indigenous party tem aser telok balala sabang ka nung anidena liasü.
IPFT lennir aikati party toktsür Pradyot den aden. Ajisüaka, pai party tasen ka tentetba ajanga BJP ajangzüktsü kechiyong lisopur alidak CPI-M aser Congress tashi mait akümtsü.