Prafulla Mahanta-i Assam nung ILP amshitsü akhanger

Guwahati, Luroi (August) 22 (Agencies): Assam nunga Inner Line Permit inyakyim tenzüktsüla kechiasen state ya ozüng alema arurtem bendendak ama kümogo ta taoba Assam chief minister & AGP founder president Prafulla Kumar Mahanta-i ashi.
Arunachal Pradesh aser Meghalaya state tem nung ozüng alema arurtem mita aoba dak sendakba nung pai iba osang metetdaktsü.
State ana nung meindokba ozüng alema arurtem Assam nung arua jenokba atema ola madokba asoshi Mahanta-i state sorkar aitsü.
“Kanga dang tesüngmangtsüka, state sorkar iba tebilemtsü atema ola madoker” ta pai ashi.
2016 nung Mahanta-i Centre sorkar dang Citizenship (Amendment) Bill, 2016 nung Inner Line Permit (ILP) system ama Assam nung lisopurtem kümzüka ayutsü atema ozüng yangluang ta takhangba agütsü.
Iba mapang pai Asom Andolan Sangrami Mancha indang teshimtet telok ka anir Centre den ajurutep.
1971 tashi Assam nung bendangertem kanga arua ali anungji Arunachal Pradesh, Nagaland aser Mizoram nung ama Assam nunga ILP mesükba mapa inyaktsüla ta Mahanta-isa metetdaktsü.
State asem nung Inner Line Permit system lir aser iba ajanga bendangertem aruba aser aliba azüoker.
Assam BJP tir Ranjit Das-i NRC indang onük jembiba Mahanta-isa aitsü.
December 31 tashi nung final NRC sayatsübaji tamakoktsü ta yashi Ranjit Das-i ashi.