Pragya Singh Thakur

Bhopal Lok Sabha constituency nungi Hindu tamangba lennir Pragya Singh Thakur-i BJP candidate ka ama tokteptsü shimba atema linük nung nisung aikati ashishir. Hao, India nung political party balala nungi tokepa aruba candidate aika ozüng alema inyaksangshiba ken o balala kübok tai tonglokja aliba asenoki meteta lir, saka Pragya Singh Thakur yabo kiralongraba mapa inyakba atema tai tonglokja aliba nisung ka lir. September 2008 Malegaon bomb lendong atema la dak tongti süa tai tonglokja lir. Iba lendong nung nisung 6 pokset aser iba tasa ya lai atonga inyak ta temulung melemi bilemer. Iba yongji, kiralongraba anemba political party kati Unlawful Activities (Prevention) Act kübok tai tonglokja alir ka par candidate asütsü shimba atema ashishiteper. Pragya Singh ya tang bail nung chioka lir. Candidate aika ozüng alema inyakba ken o balala kübok tai tonglokja lir saka nisung telok ka dak tenük yoka bomb pokdaktsüba mapa inyakba atema tai tonglokja lir ka BJP-i par candidate asütsü shimbaji teratatsüka lir. BJP-i Pragya Singh shimba ya Hindutva tangatetba nung ajemdaker shimba südi ta bilemer. Bhopal nungi la candidate ka asütsü meshim tashibo la ya BJP züngsem tajung ka nisungtemi kangabo mejangjai liasü. Kiralongrar tongti ka ta tai tonglokja alir ka election nung candidate ka ama shimba ajanga BJP-i ‘Hindu’ mesüra ‘saffron’ kiralongrar telok kodanga maliasü ta sayunür ama ajiteter. Malegaon nung bomb ana pokdaktsüba (2006 aser 2008), Panipat anasa Samjhauta Express nung bomb pokdaktsüba (February 2007), Mecca Masjid, Hyderabad nung bomb apokba (May 2007) aser Ajmer Dargah nung bomb apokba (October 2007) tatalokba ajak ya ‘Abhinav Bharat’ ta ser Hindu telok ka den sendaktepa liasü, saka item ken o atema yimtenren tashi ajanga National Investigation Agency (NIA) posema nungiter maliasü aser ano parnok ket nunga nisungtem aija aputsü tashi maliasü. Pragya Singh shimba sülen kobi melii BJP tejak metentettsüsa mapang kar bentsür aru aser item rongnung Mumbai Police Anti-Terrorist Squad tanishir asür Hemant Karkare, IPS aitsüba lir. Maneni, laisa Babri Masjid raksatsüba nung laia shilem agiba atema kanga pelar ta osang ka metetdakja liasü. Tanü India nung yanglua aliba election law nung onük kar kübok aitsür mesüra küm 2 tashi tepuokdak ayutsü temerenshi angur dak alaka ozüng alema inyakba ken o nung tai tonglokja alirtemi candidate ka ama metokteptsü tenokdangba mali. Tanü India ya Hindu linük ka mesüka küma odar kechiyong nübo teimba tsütsü shir, parnoki aginüba ama ozüngtem, ketdangsübaren aser yimten mapa inyaker. Taoba mapang Hindutva tangatetba ya tezü nung dang liasü saka tanübo iba tangatetba ya yimten yimsüsüba nung tongti kümdaktsüogo. Asenoki reprangdangra, Minister, MP aser MLA temi odi odia linük nung telok tilatem dak tashiyim mapa inyakertem metentsür, Muslim nunger tepsetertem nem tenüngsang agütsür aser parnok tangatetba (Hindutva) anemertem amokmerena linük anemertem ta züngshir. Anungji, Pragya Thakur ka ama nisung kati election nung toktepa takok ngura, alima nung democracy tulutiba ta züngshiba linüki secular tamendakdak yutsütsü aser nübo teimba tsütsü shir, Hindu rashtra (linük) ka ama ketdangsüa aotsü ana nung dang lir.