Pragya Thakur anema ken o benok

Bhopal, Rongchii/April 23 (Agencies): 2008 Malegaon nung bomb pokdaktsüba ken o nung aija alila BJP lenir Pragya Singh Thakur-i Mongolbarnü, la Lok Sabha election nung metoktepdaktsütsü atema ken o benokba ya kecha tamendakdak mali aser yimdenren tsütsü sendaktepa lir, ta shiogo.
Iba bomb apokba lendong nung asür rongnung tebu kati Mongolbarnü okadak, Thakur Bhopal nungi election nung metoktepdaktsütsü asoshi khangogo, shiba iba ken o nung aija alir rongnung tongtiba lir.
Iba takhangba dak sendakba nung Thakur-i la okatsür ajanga National Investigation Agency case tem atema special judge, V S Padalkar nem telangzüba agütsüogo.
Lai ashiba agi, “ken o benokeri yimjak nung ken o metetdaktsütsü atema aser yimden yimsüsüba tsütsü tajangzüka asoshi asaa iba okadak ken o benoktsü shim.”
Ken o benokeri okadak senti mapang lalutsüba dang masü saka iba okadak tenüng menüktsütsü asoshi asaa inyak, ta laisa ashi.
Okadak ajanga iba ken o agienba den tapet temerenshi agütsütsü yimlaba lai lemsatep. Laisa, tamendakdak kecha makai ib amala ken o benokba sashishia merenshitsü mepishia liasü.
Congress lenir Digvijay Singh den Bhopal Lok Sabha menden atema tokteptsü asoshi BJP puri Thakur shimba sülen iba ken o ta Nisar Sayyad-i benok. Par chir Malegaon bomb apokba lendong nung tepseta liasü.
Ken o benokeri, Thakur shiba tang bail nung lir, la Mumbai nung ken o obendanga aliba nung adentsü asoshi okadaki aotsü aser election nung metoktepdaktsütsü asoshi akhang kechiyong ken o tang asadangba mapang lir.
Paisa, Thakur ya health ground nung ajemdaker bail agütsü. “Meyiwa tatsük mapang la election nung tokteptettsüsa temang anema lira, lai okadak ashioktsüogo, ta ashi.
Maharashtra, Nashik district kübok 2008 küm September 29 nü Malegaon bomb apokba lendong nung nisung trok asü aser 100 dak tema yirua liasü.
Maharashtra Anti-Terrorism Squad-i iba ken o dak sendakba nung Thakur aser tangar kar apu. Iba lendong atalokdaktsüba Hindu extremist group ka nung parnok densema lir ta aija parnok apu.
NIA-i Thakur nem kecha tai mali ta kuli agütsü saka okadak ajanga Thakur ken o magientsü.
Maharashtra Control of Organised Crime Act kübok la aija aliba aginogo, saka Unlawful Activities (Prevention) Act aser Indian Penal Code sections tem kübok la manei aija ken o ashishitepdar.