Pragya Thakur-i tatok meshi

Bhopal, May 20 (Agencies): Bhopal Lok Sabha menden nungi BJP candidate Pragya Singh Thakur-i tawa tu ashishitep aketba onük ka jembiba atema Hombarnü lai tatok meshi aser lai iba atema ghonda 63 ola madoki süitsü ta metetdaktsü.
2008 Malegaon bomb lendong atema tai tonglokja alirtem rongnung Pragya dena lir. Mahatma Gandhi tepsetsang Nathuram Godse ji linük meimer ka ta taoba hopta BJP lennir Pragya-i jembi.
Iba ya mejembidang laisa taoba mapang lai atakatemba ajanga 26/11 Mumbai amakdang Maharashtra ATS ketdangser Hemant Karkare tepset ta shia liasü.
Godse indang olen jembiba ya magizüker ta BJP-i metetdaktsü.
Pragya Thakur-i Mahatma Gandhi mezüngmeshiba atema kodanga tatok magütsütsü ta Prime Minister Narendra Modi-ia ashi.
Hombar anepdang nungi lai ’21 prahar maun’ (ghonda 63 ola madokba) tenzükogo, ta la den yariteper kati ashi.
“Election maparen tembangba sülen tang pei tanüla bushiba mapang ka aruogo. Iba mapang ni jembiba o tem ajanga linük meimertem temulung yiruja lira, iba atema ni tatok meshir. Taküm timi libaliroba aser tatok meshiba tamaitsü ni 21-prahar silence agir” ta Pragya-i Twitter nung Hindi agi metetdaktsü.
Pragya Thakur-i ashishitep aketba onük jembiba atema Election Commission of India-i la ghonda 72 atema Lok Sabha elections atema nüboyimba maparen meinyaktsü tenokdangba agütsü.