Pranab Mukherjee-i Arunachal nung PR agütsüogo

New Delhi, Jan.26 (TYO) : Mongolbar nü tir Pranab Mukherjee-i Union cabinet telemtetba nung hai haura akaba  sülen Arunachal Pradesh nung President’s Rule agütsüogo.
Arunachal Pradesh nung PR agütsütsü asoshi langer ta Deobar nü Union Cabinet-i telemtetba ka tir temelaba agitsü asoshi yoka liasü.
Centre sorkari lemtetba pu sema ashidang, Arunachal Pradesh nung PR agütsütsü Union Cabinet-i telemtetba agibaji shitak liasü kechiyong ita trok tashi tatar senden mejateptetba ajanga temzüng nung timtem adoka liasü ta Union minister of state for home Kiran Rijiju-i metetdaktsü.
Hombar nü tir Pranab Mukherjee-i kilo kilonser  Rajnath Singh jar pa dang AP nung PR agütsütsüsa akümba kuli asüngdanga liasü.
AP nung Union cabinet-i PR agütsütsü lemtetba anema Congress teloki tir nem ken o ka agüja aliba nung, AP nung BJP teloki ashiba angaa angh-i timtem adokdaktsür ta aija metetdakja liasü.
Iba dak sendakba ken o bener Congress lenirtemi tir ajurua pa nem metetdaktsü aser ano kasa ken o ya Supreme Court nung agüja lir.
Iba ken o bener Chief Justice T S Thakur ajurua pa dang yakta jembidaktsüner ta asüngdangba ama, pai Bodbar nü jembitsüba nung enokdakja lir.
Arunachal Pradesh nung Nabam Tuki-i aniba Congress sorkar nung timtem ajurubaji parnok angh-i tatar senden January 14 nü agitsü lateter lia Speaker anendaktsütsü asoshi tatar senden amentsü anogoji atsüzüker December 16 nü amentsü jatepba ajanga tenzükba liasü.
December 16 anogo nungji Tuki maginer Congress MLA 21 den BJP MLA 11 aser independent MLA 2 community hall ka nung tatar senden amen aser iba senden nung parnoki Speaker Rebia anentsü.  Iba senden nung deputy speaker T Norbu Thongdok menden liasü. Arunachal Pradesh tatar senden nung tatar menden ajak agi 60 lir.
“Onoki Supreme Court nung iba ken o benoktsü. Republic Day nung parnoki President’s rule agütsüogo,” ta Nabam Tuki-i par state nung PR agütsüba osang angashia metetdaktsü.