Prangpong abener telok den yimtenren ken o mejembitsü: Assad

Damascus, December 12 (Agencies): Tongpang nung amshitsü prangpong oset abener teloktem den ajurutepa yimtenren ken o jembitsü memulungba olen ka Syria Tir, Bashar al-Assad-i tanü Honibar nü sangoktsüogo.
Assad-i tanü iba olenji sangoktsüba ajanga US aser Russia nati United Nations (UN) den külemi lokteper taruba January ita amentsü ayongba Syria yimjung senden amajok kümdaktsütsüsa tang tensa bener arutsür lir.
US-i ayonger Vienna nung amenba Syria yimjung senden nung Syria’er oppostion telok aser Syria sorkar anemba telok 12 dak tema nungi lenirtemi külemi lungjemer telok tenteta Syria sorkar den taruba January ita ajurutsü telemtetba ka tan Brehostibar nü agia lir.
Tang Syria aser Iraq na nung tesep tenteta lendong kanga sashia atalokdaktsüba kiralongrar telok tetsüti, Islamic State (IS) samatsütsü nükjidong tulu nung tan telemtetbaji agiba osang jangjaogo.
“Tongpang oset abenba teloktem den ajurua Syria yimtenren ken o mejembitsü,” ta shia, Washington o Saudi Arabia nati Syria’er yimtenren ken o jembitsü sabang nung kiralongrartem anioktsü meranger ta Assad-i tanü aitsüba olen ka metetdaktsü.
“Tongpang osettsüset toktsür Syria sorkar den tanaben lokteptsü temulungtetba aliba teloktem den dang sorkari ajuruteptsü mulunga lir,” ta pai ashi.
Paisa ashiba agi, “Kiralongrar teloktem den New York mesüra alima tesem balala nung ajuruteptsüji amajok lir kechiyong Syria sorkari tongpang nung amshitsü prangpong abener shia kiralongrar ka ka ta züngoker”.
Ano külen, Syria opposition aser sorkar anemer telok lenirtemi Syria sorkar den ajurutepa yimjung nung alitsü onük benoka jembitsü renemshitsütsü nükjidong nung Assad anemba linüktem nungi Foreign Minister-temi Russia aser Middle East linük lenirem den Paris yimti nung taruba Hombar nü teloktep senden ka amentsü renemba osanga angazükogo.