Prangpong abenertemi Pak University nung nisung 30 shi tepset

Islamabad, January 20 (Agencies): Tongpang nung amshitsü prangpong abener telok kati Pakistan northwest tsütsülen tentetba university ka tanü, Bodbar nü amakba osang ka sorkar ketdangsertemi metetdaktsüogo.
Tanü amaker nisung 4-i tanep 9:00 ako meta Charsadda jila nung tentetba Bacha Khan University telungi tashiyim agi aia idakji alir kaketshir aser tesayurtem amakba osang jangjaogo.
“Tan amakertem rong nung peisasa pokseta asütsü mulungteter nisunga 2 tashi densemba osang jangjaogo,” ta shia, tanü lendong nung kaketshir timba densema, nisung 30 shi asüba aser nisung 19 shi yiruba osang jangjaogo ta Regional deputy inspector general of police, Saeed Wazir Khan-i osang jangjashitsü.
Paisa ashiba agi, tanü lendong nung nisung asüba osangji tang jangjaba den timba akümtsü akok.
2014 küm December ita Peshawar school amakba maparen nung tongti shilem agir tongti Pakistani Taliban lenir, Umar Mansoor-i tanü lendongji par Taliban teloki atalokdaktsü ta tenüng agia metetdaktsü saka tesülen, Pakistani Taliban otongdar, Mohammad Khorasani-i tanü lendongji par teloki meinyak ta osang jangjashitsü.
“Ozü mitkartemi tanü lendong atalokdaktsür ajunga injang agi kasetba sülen university telungia kinük kisang ajunga mita kiralongrartem bushia liasü,” ta Pakistan mitkar otongdar, Asim Bajwa-ia metetdaktsü.
“Tanü lendong nung nisung asür aser yirurtem den sasaba olen lemsateper,” ta shia, tang Switzerland kübok Zurich yimti semdanga alisang, Pakistan Ato Kilonser, Nawaz Sharif-i tanü lendong atalokdaktsüba maparen kanga sashia aitsüogo.
Tanü lendong atalokdak, Charsadda jila ya Khyber Pakhtunkhaw province yimtiba, Peshawar nungi kilometer 50 shi pilar lir.