Prangpong agi makoktsü

Naga yimten nüchiso ya injang agi kazüktettsüka asünungbo kazüker lila aser ano külen Naga yimten nüchiso atema nokdakba temeten ya injang agi anendaktsütettsüka asübo anendaktsür lila. Joko, küm talangka India nungertemi Naga yimten nüchiso asoshi nokdakba temeten ya mali küma samatsütsü asoshi sepaitem amshir saka mesamar. Ano, külen Naga nunger linük tenzükertemi Naga yimten nüchiso asoshi taküm ajak bendanga agüja rarar saka mangur. Iba tetsüngda nungji injang kata mekhadoki aser taküm kata mesamai tangatettep nung telemtetba kati arutsüsa Tsüngremi tesem ka yuja lir südi ta amanger. Iba tamang teimla aser tangatetba nung India government-ia Naga nunger linük tenzüker telok kar denbo yimjung yangluogo aser ano telok kabo India government den ken o benoka jembidagi. Ajisüaka, temulung tipmatemtsüba kaji NSCN (K) telok o India government na tsüngdangbo yimjung yanglua maka nungji Naga yimten tebilemtsü latettsü atema telok kati India government den jembir aruyonga, iba jagi Naga yimten tebilemtsübo tatembang mekümtettsü amai Naga nunger tensa tamajung ka nung nokdaka lir. Iba ama mapang ka nung, ano yakanü Mon district kübok Tizit anasa Lapa nung India sepaitem o telongpurtem na khatepba lendong nung nisung pongo tashi asübaji ajak atema kanga takoksa asütsü. Iba tongpang nung telok na khatepogo saka nisung taküm samaba dak alaka takokerbo mali Nagaland asoshi shisabolutsüka kümogo. India asoshia sepai tulur ka asübaji kechi agi menoktettsü aser Naga nunger asoshia linük tenzükertem taküm samabaji kechi agi menoktettsü. Iba amai yimten ken o nung mangatettep adoka nisungi nisung khaseta inyaktsüba yabo tamashi  mapa asütsü. Talisa tanü tensa prangpong apur yimten nüchiso asoshi raraba agi asenokang takoksa tulu angutsü ta meteta tensa den apet yimten aser nübortem asoshi raraba inyakyim melentsü nüngdaker. Yimten tebilemtsü liaka, Naga nunger tia ajung Naga nunger lokti tentet aika lir. Item lokti tentettemji yimten asoshibo nüngdak nung raratsü atema sepai battalion tenteta camp lapoka ayu amai lir. Anungji, item lokti tentettem rongnung , talisa, Naga kin shia telongjem tenteta aliba teloki India government o Naga nunger linük tenzükertem telok na tsüngda yimjung meyanglui lira yimjung yanglutsütsüla aser parnok tsüngda ken o jembi tenzükdaktsütsüla. Asen lima nung lokti tentet aika pei khuret memetet state goverment nem mesüdaktsür-a mesük aser political party lenirtema pei party jenjang memetet, meshimetsüa dang senzüba ajurur. Tanü iba ama meshimetsüba jenjang nungi Naga nunger lokti aser yimten lenirtem adoktsüla aser Naga nunger asoshi kechi shitak aser kechi tajung aji agütsütettsüla. Tanü ama tensa nung kechiba asen lima nung asen nisung prangpong apur senzüdaktsütsü. Ibaji kanga shisamaka mapa lir. Joko, Naga yimten tebilemtsü latettsüba khuret ya Naga nunger inti khuret asütsüla. Aji oda, Naga nunger yimten aser lokti lenirtem adenshir India aser Myanmar na prongla den jembitsüla. Asenoki metettsüba kaji, tanübo akhidang ama tesem ka nung miima jenoka yur shingaia pei lima nüchiso asoshi meraratettsü. Pie lima nüchiso asoshi raratsübaji Gandhii anir raraba ama ochi agi raratsüba dak alaka tanga hadir agi makoktsü. Kechiba Naga nungerbo tebilemtsü patetka ya yur sen aser tashiyim amshia India temzüng kübok election agitsü dang yongyar ? Kechiba Naga nunger yimten nüchiso bushirtema tebilemtsü patetka ya anendaka yur, India temzüng kübok election agiba nung shilem agitsü jangrar ? Iba amaji asenoki asenoksasa India nunger tsüngdang temenünütsüka litetter ! Joko alima libaliro aser inyakyim kenyongi balaka kümogo. Ibai yimten nüchiso tenüng nung telok ka anati inyakba putu masü saka tongpangji nübortem meyong asütsüla aser nübortemi jembitsüla. Idangji dang prangpong agi makokba tongpang nübortem ola agi akoktsü.