Prannoy, Srikanth quarter final-i iogo

Jakarta, June 15 (Agencies): Brehostibarnü India nunger asayar H S Prannoy-i Malasyia nung World No.1 Lee Chong Wei straight game nung koka Indonesia Super Series Premier badminton asayamong quarterfinals tongtetogo.
World No. 25 India nunger asayar-i Jakarta Convention Center (JCC) nung tebur kicha asaya nung Olympic nung silver medal asemben tashi koker alisang Lee minute 40 agia 21-10 21-18 agi kokogo.
“Tanübo Lee-i junga masayatet aser ibaji maongka agia ni asayaogo. Iba asaya akokba atema ni kanga pelar,” ta Prannoy-i ashi.
Maneni K Srikanth-ia 21-15 20-22 21-16 agi fourth seed Denmark nunger asayar Jan O Jorgensen madak takok ngua quarterfinal-i iogo.
“Tanü asaya kanga tasak liasü saka iba asaya akokba atema ni kanga pelar,” ta asaya temer Srikanth-i ashi.
Prannoy taruba asaya Olympic champion China nunger asayar Chen Long den asayatsü aser Srikanth Chinese Taipei nunger Tzu Wei Wang aser Hong Kong nunger asayar Ng Ka Long Angus na asayaba sülen takoker den asayatsü.
Prannoy-i asaya tetenzük nungi kanga junga asayaa tenzük, pai asaya tetenzüklen 6-0 agi tejakdang ser tenzük aser iba sülen 10-3 küma pa nem iba asaya akoktsü asoshi maongka agütsü. Break sülen pai maneni kanga junga asayaa mezüngbuba set pai akok.
Tanabuba set asaya nung maneni Prannoy-i point 10-6 ta nguteta point 4 agi Lee jakdang liasü saka mapang tatsüka tsüngda nung Lee-i menepa atua point 13-12 aküm saka Prannoy-i kanga junga asayaa tanabuba set pai 21-18 agi akok. Iba takok ajanga Lee-i iba asayamong 7ben buba koka otsü tasen ka yanglutsü aliba maongka agintsü.
Tanga asaya ka nung World No. 22 Srikanth-i Jorgensen den kanga meranga asayar ang tanabuba round koktetogo. Tena asaya minute 57 asayaa liasü.
Mezüngbuba set nung tenapronglai kasa dang asayateta point 10 buba tashi kasa dang atu, iba sülen Srikanth-i point 4 tashi atonga nguteta 17-15 akümba sülen pai iba asaya akok.
Tanabuba set nung asayar anapronglai ka nem dang maongka magütsüi point khen 11-11 aser asaya tatemi 20-20 ta kasa dang liasü, saka Jorgensen-i point ana nguteta pai tanabuba asaya akok.
Deciding asayaba nung Jogensen-i 5-0 agi tejakdang ser asaya tenzük saka Srikanth-i asaya peyong aibelen mesüi kanga junga asayateta pai Jorgensen madak takok angu.