Prasar Bharati-i Arunachal aser Sikkim nung temelung agutsütsü

Itanagar, January 8 (Agencies): Prasar Bharati-i Doordarshan meyong tanabuba channel northeast asoshi DD Arun Prabha amenlokba sülen, Hokolbarnü mezüng shisa lemsa senden kaogo.
Arunachal Pradesh nung film ajungkettsüba dak rangloker iba senden amen. DD Arun Prabha sendongtem asoshi tejangja olemtep aka.
Director-general Supriya Sahu, senior IAS officer-i aniba Prasar Bharati telok aser Arunachal nungi Film Federation of Arunachal tir Chopa Cheda-i anir iba senden amen.
Iba senden nung Supriya-i producers aser director tem dang serials, telefilms, documentaries aser sendong balala asoshi tasen purapiteta inyaktsü ayongzük. Tongtibangsa Arunachal aser Sikkim-i koba sendong apitetdanga lir, item sentongtem temolung nung yur inyaktsü, ta laisa ashi.
“Iba channel yagi northeast ajunga ayimjema sayutsü, saka talisa Arunachal aser Sikkim pur indang sendongtem dak rangloker sayutsü,” ta lai ashi. Sentongtem kanga junga asadanger tajungtibatem ang sayatsü, ta laisa shisem.
Film yanglurtem dang maneni sentong tajung purateta sayatsü ajungshi.
FFA tenüng nungi jembidang Cheda-i Doordarshan dang Arunachal nunger film tem sayutsü mepishi. “Arunachal nung sempet tajung aika lir, saka maongka manguba ajanga ajak tezü tangteper,” ta pai maneni shisem.
DD Arun Prabha-ji 24×7 DDK, Itanagar nungi tentetba satellite channel asütsü. Information aser broadcasting ministry-i iba channel amenloktsü asoshi broadcaster tem nem sen crore 7 agütsüogo.