Prashant Kishor-i elections nung metokteptsü

Patna, Mongputeni (October) 23 (Agencies): Election asalentong yanglur nungi yimsüsür akümsang Prashant Kishor-i taruba küm 10 tashi elections nung shilem magitsü ta metetdaktsüogo.
Pa ya JD-U nung Vice President inyaker aser tanü pai Bihar state renlokdaktsütsü atema inyaktsü asoshi election nung metokteptsü ta ashi.
Taküm September ita pa Janata Dal-United party nung aden aser pai party tashi itdaktsütsü atema akokba tashi inyaktsü ta Mongulbarnü lanurtem den jembidang Kishor-i ashi.
“Taruba küm 10 tashi Lok Sabha mesüra Rajya Sabha atema ni elections kecha nunga metokteptsü, aser Bihar tenzüktsü. India nung developed state 10 rongnung Bihar dendaktsütsü atema ni alizüng yua lir” ta Indian Political Action Committee (IPAC) tenzüksangi metetdaktsü. Pa ya October 16 nü JD-U nung Tatong Tir inyaktsü shim.
Taoba BJP poll strategist Kishor-i 2014 general elections nung Narendra Modi’er telok atema takok tulu angutsüsa mapa inyaktsü aser nisung aikati pa 2019 Lok Sabha elections nung tokteptsü ta jembia aru.
JD-U president aser Bihar Chief Minister Nitush Kumar-i arishi küm 41 tain Kishor Rajya Sabha-i yoktsü akok ta imla liasü.
Nitish Kumar-i Kishor ajungketba ya yimten mapa tajung ka lir ta nisung aikati bilemer, kechiyong 2019 Lok Sabha elections nung Nitish-i takok tajung ngunür.
“JD-U sasep nung aser tema nung Prashant Kishor ya Nitish Kumar den tesentaktep tajung aliba nisung ka ta züngshir. Chief Minister-i pa dak temulung kanga alemer” ta JD-U party lennir tejen kati ashi.
Kishor ya taoba UN ketdangser ka lir aser paisa Citizens for Accountable Governance (CAG) tentet. 2015 Bihar Assembly election nung pai Nitish Kumar-i aniba Grand Alliance atema nüboyimtsüba sentong ketdangsüa agi.
Grand Alliance nung JD-U, Lalu Prasad’er Rashtriya Janata Dal aser Congress dena liasü aser parnoki BJP-i aniba alliance madak takok tulu angu.
Tesüiba anogo ana Kishor-i kanga dang mazüngi JD-U lanur aser kaketshir kongsangtem den ajurutepa senzür. Pai züngsem shia dang züngsem 200 bendenloktsü atema tayongzüba agütsür.