Prashant Kishor-i NCP tongti, Sharad Pawar den senden amen

New Delhi, June 23 (Agencies): Yimtenren aser election asalentong yanglur mongin, Prashant Kishor-i Bodhbarnü-a Delhi nung Nationalist Congress Party (NCP) tongti, Sharad Pawar ajurua senden menogo.

Hopta ana tsüngda pai tang agi tasembenbuba Pawar den senden amener.

Mongolbarnü Pawar leniba nung Opposition party tem senden mena liasü.

Tan hopta tetenzüklen, Hombarnüa Kishor-i Pawar den senden mena liasü. Taruba Lok Sabha election nung BJP tamakok ngudaktsütsü atema opposition party tem longjemer teloktep ka yanglutsü atema NCP-i inyakdar.

Tawa Tamil Nadu aser West Bengal assembly elections nung Kishor-i DMK aser Trinamool Congress na atema election asalentong yangluja party anapronglai takok angu.

Mongolbarnü Pawar-i ayongzükba senden nung Trinamool Congress, Samajwadi Party, Aam Aadmi Party aser Rashtriya Lok Dal densema opposition party ti nungi lenirtem aden.

Ajisüaka iba senden nungji shilem agia adenertemi, senden nungji yimtenren dak sendakba onük mejembi, ta metetdaktsü.

Mongolbarnüsa Pawar leniba nung NCP national executive senden amen aser senden nung taruba Lok Sabha election aser tang linük yimtenren tensa atema jembi.

Mongolbarnü Pawar’er kidang ayongzükba Opposition party lenirtem senden nung adenertem rongnung National Conference lenir, Omar Abdullah, Samajwadi Party nungi Ghanshyam Tiwari, RLD Tir Jayant Chaudhary, AAP lenir Sushil Gupta, CPI nungi Binoy Viswam, CPI-M nungi Nilotpal Basu aser TMC tatong Tir, Yashwant Sinha nunger liasü.

Senden nungjisa taoba mapang Congress lenir Sanjay Jha, taoba mapang Janata Dal-United (JD-U) lenir, Pavan Verma, taoba mapang ambassador KC Singh aser Justice (retd) A P Shah nungera shilem agia aden.