Prashant Kishor-i October 2 nü yimtenren party ka tentettsü

New Delhi, Chiteni/July 29 (Agencies): India nung election asalentong yanglur mongin, Prashant Kishor indang organization Jan Suraaj Abhiyan-i October 2 nü yimtenren party ka tentettsü; iba anogo ya Mahatma Gandhi sor küm 155 ajungba anogomong asütsü.

Bihar nung assembly election agitsü jakdang Prashant Kishor-i state level senden 8 ayongzüktsü aser iba nungji ketdangser lakh 1.5 adentsü.

Item senden nung party tasen tentettsü, lenirtem shimba inyakyim, temzüng aser party nükjidongtem atema jembitsü, ta Prashant Kishor indang organization-i osangbenertem senden ka nung metetdaktsüogo.

Anogo ishika jakdang Prashant Kishor-i, nisung crore 1 shi Jan Suraaj nung adentsü aser iba mapang nungji full-fledged party akümtsü, ta metetdakja liasü.

Jan Suraaj Campaign Committee züngsemtem den senden amendang pai iba osang ya mezüng metetdakja liasü. Pai züngsemtem dang, Bihar nung kin nung ajemdaker telemsa tulu adoka lir, anungji Bihar nung nüburtem ka küma longjemdaktsütsüla, ta ashi.

Kishor-i, sentong ajak takok ngua arudar, ta shia pai committee züngsemtem dang inyakyim nung temelenshi adokdaktsünüra nenoki nüburtem nem tama angatetdaktsütsüla, ta ashi.

Kishor-isa, Bihar nung yimtenren jenjang melenshitsü atema par party-i state nung aliba assembly menden 243 prongla nungi tokteptsü, ta metetdaktsü.

“Menden 20-25 nung takok angutsü atema masü saka Bihar nung temelenshi adokdaktsütsü atema onoki iba mission tenzük. Küm ana aremzüka liang,” ta pai ashi.

Kishor-i, “State nung tongti party asem rongnung RJD-i tetsübuba. Ni ashiba angang. Milen (RJD party temaitsü) ji tsükloktsü atema kerosene totzü manüngtsü. Minority nüburtemi kodang Jan Suraaj campaign nung dendir milenji aseptsü,” ta metetdaktsü.