Pratyusha Banerjee soseta süogo

April 02, 2016 : TV show ‘Balika Vadhu’ nung Anandi ama shilem agila actress Pratyusha Banerjee soseta asüba ajanga Bollywood aser TV industry kanga aoksatep.
Karan Johar, Arbaaz Khan, Simi Garewal aser Karishma Tanna nungeri arishi küm 24 tain actress, Pratyusha asüko lemsatepogo. Pratyusha ya Hokolbarnü soseta asü. La ya la aliba kidang fan ka nung sangzüa alener lia kari ngur Kokilaben Ambani mozü kidangi teyari bushia anir ao saka mekümzükteti yangji asü.
Celebrity temi la den asüko lemsatepa ashiba o kar teküpoklen agütsür:
Robin S : Pei sasa alenseta asürtemji tasü mait nisungtem lir aser parnoki tatalokbatem tsübur, anungji parnok atema mang mayimtsüla.
Simi Garewal : Serial aika liaka ni ‘Balika Vadhu’ anga repranger. La atema jashia bilemtsür. Tetsür kaji kibongi menungitra la asoshi lia aotsü kanga tasak lir.
Karan Johar : Ya kanga tejashitsüka lir. Iba tatalokba ajanga tsürabur aser medemertem dang shisabulu atema medical teyari nüngdaker ta angatetdaktsür. Pratyusha Banerjee na kanga junga anisüngzükang.
Madhur Bhandarkar : Pratyusha Banerjee ajungbena asüba angashia kanga aoksa aser jashia bilemer. Tsüngremi lar kibong nem anisüngzük agüjangma.
Anupam Kher : Pratyusha Banerjee asüba osang angashia kanga mepelateter. Lar kibong nem Tsüngremi tashi agüjangma.
Rishi Kapoor : Nübu tajung ka pei sasa asübaji taktsü mapa lir! La telung nung okrongbaji shibai metettsü? RIP.
Arbaaz Khan : Pratyusha osang angashia jashir. La tanela süngjema anisüngzükangma. Mangyim tia nung alidang Tsüngremi lar kibong tali tasü itdakjang.
Sophie Choudry : Pratyusha Banerjee alenseta asüba angashia kanga aoksaogo. Iba osang angshia tobur tajung aser sempet tajung aliba aiürtem, Nafisa aser Jiah nunger bilemteter. Ya kanga temulung raksatsü mapa lir.
Karishma Tanna : Kanga dang taoksatsü aser tejashitsü osang…RIP Pratyusha.
Gauhar Khan : Jashir, jashir, jashir…kecha agia taküm laluba bena marutettsü…ni lar tsürabur aser kinüngertem atema temulung shirangtsür. Pei sasa asüba ajanga kecha meyalushitet. Tsüngremi la tanela anisüngzükdakjangma.