Pravin Togadia-i Narendra Modi aitsür

Ahmedabad, Rongchii (April) 15 (Agencies): Hindu nunger lennir Pravin Togadia-i Amungnü (Deobar) Narendra Modi’er sorkar anema jembi.
Togadia-i Vishwa Hindu Parishad nung International Working President inyaka liasü saka yashi pa iba menden nungi atsüngdok.
2002 Godhra mepetmesü adokba sülen nungi pai Prime Minister Narendra Modi dak tezü atangtsü tenzük ta Togadia-i ashi aser pai Sangtennü (Mongulbar) nungi lumia lungkak aittsü ta shisem.
“Ni joko VHP nung maden. Ni Hindu nunger ajungkettsü atema maneni mapa inyaktsü. Sangtennü (Mongulbar) nungi ni Ahmedabad nung Hindu nungertemi mapang talangka takhangba agüja aruba onüktem atema lumia lungkak aittsü” ta paisa ashi.
Togadia ya Küptoknü (Honibar) aonung Ahmedabad tonga aru aser Amungnü (Deobar) pai Gujarat nung pa den yaritepertem aser VHP ketdangpurtem den ajurutep.
“Tesüiba küm pezü tashi ni iba sorkar dak tezü tanga aruogo. Tezü atangbaji Gujarat nung 2002 tatalokbatem sülen nungi tenzük” ta pai osangbener dang ashi.
“Godhra lendong atalokba sülen police-i Hindu nunger aika khaset. Kechiba ‘Narendrabhai’ (Narendra Modi) chief minister inyakdang yamaji atalokar ni mangateter” ta paisa shisem.
“Hindu nunger meyijang aika anema ken o tem benok aser parnok tepuokdak ayu” ta Togadia-isa metetdaktsü.
“2014 elections nung VHP-i Narendrabhai yari saka pai gau-rakshaks dang ozüng alema inyakertem ta aja. Iba onük nung ajemdaker Jharkhand nung okadak kati nashi kümzüker 11 taküm piyong tepuokdak ayutsü atema temerenshi agütsü. Iba ama ya Congress sorkar mapang nunga matalokdang liasü” ta paisa ashi.
“Iba sorkar yagi Kashmir nung Pakistan pusemertem aser lung aonertem anema ken o tem benokba meyipa agiogo. Iba sorkari Pakistan pusemertem yariba angudang ni kanga aoksa” ta paisa shisem.
Pai lumia lungkak aitbaji Hindu nunger ajungkettsü aser Ayodhya nung Ram Janmbhoomi Temple yanglutsüba, linük ajungalen nashi tepsetba noktangtsü, common civil code mapa küma inyaktsü aser Kashmiri Hindu nungertem pei talidaki yoktsü atema lir, ta Togadia-isa metetdaktsü.
Modi aser Togadia naprong Gujarat nungi lir aser tenaprongla Rashtriya Swayamsevak Sangh volunteer tem ama liasü.