Pravin Togadia-i PM Modi aitsür

Ahmedabad, Rongchii (April) 17 (Agencies): Tawa Vishwa Hindu Parishad (VHP) nungi anener Pravin Togadia-i Sangtennü (Mongulbar) nungi Ahmedabad nung mapang telatet makai lumia lungkak aittsü tenzükogo.
Ayodhya nung Ram Temple yanglutsü aser common civil code mapa küma inyaktsü takhangbatem agüja Pravin Togadia-i lungkak aiter.
Iba sentong ya “Hindu Ahead” ta jaloktsüogo aser poster o pamphlet tem yua lir saka VHP tenüngbo amshia mali. Ajisüaka, Gujurat state VHP president Kaushik Mehta aser general secretary Ranchhod Bharwad naprong Togadia den külemi lungkak ait.
“Küm 50 tashi ni Hindu nunger atema inyaka arur, ni züngdok. Ni menden kecha memeshi, ni prime minister inyaktsü memeshi. Ni Ram Mandir atema dang takhangba agütsü aser iba onük atema dang pa (Narendra Modi) Prime Minister aküm” ta tanü Togadia-i Modi aija jembi.
Arishi küm 62 tain Togadia-i Modi aser Sangh Parivar den tesentaktep tajung yur mapa inyaka arur saka taoba Küptoknü (Honibar) pa pusemba Raghav Reddy-i tamakok anguba agi pai VHP international working president menden toktsütsüsa aküm.
“Ni Narendrabhai (Modi) den mangatettep kecha mali. Ni pa den ken o ka adoka alibaji Ram tekülem yanglutsüba atema pai ola madokba atema dang lir. Ni menden arshir ka asübo 2001 küm ni chief minister kümer lila. Ni nü (Modi) den mangatettep kar ali asübo na chief minister meinyaki lila” ta paisa ashi.
“Sorkari okadak tetuyuba sülen anidaktsü ta Narendrabhai-i ashir. 1982 küm iba sentong tenzükdang okadak tetuyuba kar liasü asü koda? Advaniji-i Somnath nungi Ayodhya tashi Rath Yatra agiba nai (Modi) bilemteter asü masü? 1992 küm mosque raksadang okadak tetuyuba kong liasü?” ta Togadia-isa asüngdang.
Togadia-isa linük ajunga nung nashi tepsetba noktangtsü aser Kashmiri Pandit nungertem talidak agütsütsü atema takhangbatem agütsür.