Pre & post-matric scholarship mapang atsülanger: Mukhtar Abbas Naqvi

New Delhi, Aug. 21 (Agencies) : Nübu agi tangar memenepertem asoshi 2016-17 atema Pre-matric aser Post-matric scholarship asoshi online application agütsütsü mapang September 30, 2016 nü tashi atsülangtsür.
Tawa-a Minority Affairs Ministry-i iba application agütsütsü atema mapang August 31, 2016 nü tashi atsünglangja liasü.
Union Minister of State for Minority Affairs (Independent Charge) Wb. Mukhtar Abbas Naqvi-i, linük nüburtemi iba application agütsütsü atema mapang atsülangtsü asoshi temepishiba aser tebilemba aika agütsüba sülen Minority Affairs Ministry-i iba mapang atsülangtsütsü lemtet, ta ashi.
Wb. Naqvi-i, Nübu agi tangar memeneper, nüngdaka aliba kaketshirtem lenji oa iba telemtetba agi, ta ashi.
Nübu agi tangar memeneper tsüraburtem khu pongba-a kümdakja parnok tanurtem school-i yoktettsü mechi aser item tanurtem kaket shisatsü peria ngudaktsütsü mechi nung pre-matric pur atema iba scholarship lapoktsü.
Ano Post-matric scholarship ya nübu agi tangar memeneper telok nung tekolok tajung aser sensaker tanurtem higher education bushiba nung tetsükdaktsü maludaktsüi parnoki inyaktetsü mapatem nung tali jangradaktsütsü nükjidong nung lapoktsü.