Premier Futsal: Goa-i Bengaluru telok akok

Mapusa, July 21 (Agencies): India nung tan mezüngsüa ayongba asayaba Premier  Futsal League (PFL) asayamong anogo 6 buba nung Ronaldinho melenzüksang, Cafu-i aniba Goa 5 teloki goal 3-0 agi Paul Scholes-i aniba Bengaluru 5 telok madak takok ngua tanü, Brehostibar nü asayaogo.
Michel Salgado-i aniba Kochi telok aser Falcao-i aniba Chennai 5 telok na tsüngda asayaba 2 buba asaya goal 3-3 draw nung tembanga liasü.
Tan tamakok anguba sülen Bengaluru teloki tan asayamong nung joko toktepa shilem magitettsüsa jenjang ajuruogo.
Tanü 1 buba asaya nung Michael Silva-i par Goa telok asoshi 1 buba goal agütsüba sülen tanü asaya nung Man of the Match sempet agizüksang, Rafael Silva-ia goal 1 agüja par Goa telok goal 2-0 agi temaba jenjang nung ajungkettsü.
Tesülen, asaya tenzüker minute 39 buba nung Vampeta-i 3 buba goal agüja par Goa telok nem takok ngudaktsü.
Tan takok anguba sülen Goa telok par Group B nung temaba telok kümogo.
Kochi aser Chennai telok na tsüngda asayaba Group A asaya nung Romulo aser Camilo nati 2 buba quarter asaya nung goal kaka agütsüba ajanga asaya mezüngbuba shilem tembang tashi nung par Chennai teloki goal 2-0 agi temaba jenjang ngua liasü.
Ajisüaka, 4 buba quarter nung Moraes aser Chaguinha nati par Kochi telok asoshi goal kaka agüja par telok anaprongla kasa jenjang kümdaktsü.
Yamaji asayaba sülen Romulo-i maneni goal 1 agüja par Chennai telok temaba jenjang nung ajungkettsü saka Chaguinha-ia par Kochi telok asoshi goal 1 agüja par telok anaprongla kasa jenjang kümdaktsüba yong par asaya goal 3-3 draw nung tembanga liasü.
Tan draw jenjang anguba sülen Kochi teloki par Group A nung Mumbai telok sülen anidaka, 2 buba jenjang nguogo.
Semifinal asaya nung Kolkata 5 teloki Mumbai 5 den aser Kochi 5 teloki Goa 5 den ajuruteptsü.