Premier Futsal League: Ronaldinho India tonga aruogo

Chennai, July 14 (Agencies): India nung tan mezüngsüa asayatsü ayongba Premier Futsal League (PFL) asayamong nung shilem agitsü nükjidong nung taoba mapang nungtugu FIFA Ballon d’Or takok marok 2 ben tashi agizüker, Ronaldinho India kübok Chennai yimti tonga aruogo.
Tan July ita 15 nü nungi tenzüka asayatsü ayongba PFL nung Brazil nunger arishi küm 36 tain Ronaldinho-i Goa 5 telok tenüng nung toktepa shilem agitsü renema lir.
Taoba Barcelona aser AC Milan asayar, Ronaldhinho-i Chennai tonga aruba sülen PFL CEO, Abhinandan Balasubraminian-i Ronaldhinho agizüka liasü.
Ronaldinho dak alaka, nungtugu football asayar, Paul Scholes, Ryan Gigs aser Hernan Crespo nungera ka ken ka ta Chennai International Airport tonga aruba osang angazükogo.
Ajak agi asayar 5 tashi ki kilung nung minute 40 tashi toktepa asayaba football asaya ka Futsal asaya ya lir aser tan India nung asayatsü ayongba PFL asayamong nung shilem agitsü asoshi alima nungtugu football asayartemi India bushia arutsü tenzükogo.
Tan ayongba PFL nung Portugal nunger football asayar mongin, Luis Figo Tir lir aser India nunger cricket asayar, Virat Kohli ambassador aliba osang jangjaogo.
PFL asayamong July ita 15 nü nungi tenzüka asayaba sülen final asaya Goa nung tan July ita 24 nü asayatsü renema lir.