Premier League: Liverpool aser United-i pei tata asaya akok

London, Mongputeni/October 28 (Agencies): Deobarnü Anfield nung Premier League asaya nung Liverpool-i goal 2-1 agi Tottenham Hotspur madak takok ngua parnok maneni point trok agi timba ser temaba jenjang nung lir.
Kasa mapang nung Manchester United puria Deobarnü iba season nung mezüngbuba away asaya kokogo. Asaya nung parnoki VAR ajanga agütsüba penalty ana tashi metsüpetaka Norwich City 3-1 agi kokogo aser Arsenal pura home nung goal 2-2 agi Crystal Palace den draw asü.
Newcastle United pur pongla nung aliba team asem dang nungi point 1 agi maneni timba lir aser parnok Deobarnü Wolverhampton Wanderers den goal 1-1 agi draw asü.
Liverpool pur Anfield nung asaya 45 tashi khen danga tamakok ngua mali saka Deobarnü asaya nung Harry Kane-i second 48buba nung goal ka idaktsüba sülen parnok lendong nung liasü.
Ajisüaka asaya tanabuba shilem nung Liverpool nungi asayar Jordan Henderson-i goal ka idakja Tottenham puri idaktsür aliba goal küptok aser iba sülen Serge Aurier-i box telung nung foul menaba atema Liverpool pur nem penalty metsütsü asoshi maongka agütsü, koba Mohamed Salah-i idakja liasü.
Liverpool puri asaya 10 nung point 28 nguteta lir, koba taoba season kasa jenjang nung aliba mapang dang nungi point ana agi timba asütsü.
Tottenham pur asaya pezü tashi atonga tamakok anguba sülen jenjang 11buba nung lir.
Manchester United aser Norwich na asaya mezüngbuba shilem nung VAR ajanga penalty ana tashi metsütsü maongka agütsü. Mezüngbuba penalty ya Ben Godfrey-i United nungi asayar Daniel James alangdaktsüba sülen agütsü aser tanabuba ya Todd Cantwell-i handball ka menaba sülen agütsü. Penalty mezüngbuba Marcus Rashford-i metsü aser tanabuba Anthony Martial-i metsü, saka Tim Krul-i penalty anaprongla kanga junga nokdanga liasü.
Ajisüaka asaya mezüngbuba shilem nung Scott McTominay aser Rashford nati goal kaka aser asaya tanabuba shilem nung Martial-i goal ka idaktsüba ajanga penalty metsüpetba kangabo meshisang.
Tanga asaya ka nung Arsenal pur goal 2-0 agi Palace tejakdang liasü. Arsenal asoshi Papastathopoulos aser David Luiz nati goal kaka idaktsü.
Ajisüaka Luka Milivojevic-i penalty ka ajanga goal ka küptok aser minute 52buba nung Jordan Ayew-i goal tanabuba idakja asaya goal kasasa nung tembang.